Túrkistan oblysynda bir otbasy músheleri 70 páterdi tonaǵan

TÚRKІSTAN. QazAqparat - Túrkistan oblysynyń krımınaldyq polıtsııa qyzmetkerleri 70 páterdi tonaǵan qylmystyq topty áshkereledi. Kúdiktiler bir otbasy músheleri bolyp shyqqan, dep habarlaıdy QazAqparat tilshisi.

Oblystyq PD baspasóz qyzmetiniń málimetinshe, qylmystyq toptyń jetekshisi óńirdiń Qazyǵurt, Keles, Ordabasy jáne Saryaǵash aýdandarynyń aýmaqtaryndaǵy terezeden túsý arqyly urlyq jasap júrgen.

Tártip saqshylary urylardy lombardqa ótkizgen taýarlary arqyly tapqan.

Kúdiktiniń biri buryn osyndaı qylmystary úshin sottalǵan 26 jastaǵy er adam bolyp shyqty.

Tergeý barysynda onyń tanystary men týystarynan turaqty top quryp, árqaısyna rólder bólip bergeni anyqtalǵan.

Urlyq jasaǵan kezde olar mindetti túrde úı ıeleriniń joqtyǵyna kóz jetkizip, úıdiń terezesinde tordyń, dabyl júıesiniń, beınebaqylaý kameralarynyń bar-joǵyn bilip otyrǵan.

Ár qylmysty jasaýǵa muqııat daıyndalyp, úı ıeleriniń kún tártibin zerttegen. Urlyq jasap bolǵan soń seziktini kúıeý balasy kóligimen birden alyp ketip otyrǵan.

Ári qaraı uıymdastyrýshynyń anasy men jubaıy urlanǵan áshekeı buıymdardy puldap, túsken paıdasyn ózara bólisken.

«Páterlerden urlanǵan altyn áshekeı buıymdaryn kúdiktiler sońǵy eki jyldan beri Shymkent pen Jetisaı, Saryaǵash qalalaryndaǵy lombardtarǵa ótkizip otyrǵan. Sóıtip jábirlenýshilerge 100 mln teńgedeı shyǵyn keltirgeni belgili bolyp otyr. Qazirgi tańda qylmystyq toptyń úsh múshesi qamaýǵa alynǵan» delingen habarlamada.