Túrkistan oblysynda bir kúnde ıis tıgen úsh adam kóz jumdy
TÚRKІSTAN. QazAqparat - Túrkistan oblysynda bir kúnde úsh adam gazdan ýlanyp kóz jumdy. Qaıǵyly jaǵdaılar Saıram jáne Jetisaı aýdandarynda bolǵan, dep habarlaıdy QazAqparat tilshisi.
Oblystyq gaz taratýshy mekemeniń habarlaýynsha, 10 qarasha kúni tańǵy saǵat 10:40-ta kezekshi bólimge jeke úılerdiń birinde eki adamnyń ıisten ýlanyp qalǵany jóninde habarlama kelip túsken. Oqıǵa ornyna jetken mekeme qyzmetkerleri páter jaldap turatyn 18 jastaǵy eki jigittiń qaza tapqanyn anyqtaǵan. Dál osy kúni Saıram aýdanyndaǵy Qarasý aýylynda da ıisten ýlaný jaǵdaıy tirkeldi. 62 jastaǵy azamattyń óli denesi jeke úılerdiń birinen tabylǵan. Mamandar baspanaǵa qoldan jasalǵan jylytý peshi ornatylǵanyn aıtady. Gaz taratý qyzmetiniń ókilderi eki jaǵdaıda da úı jylytý qurylǵylarynyń talapqa saı ornatylmaýlary adam ólimine sebep bolýy múmkin dep otyr. Qazirgi tańda birneshe saraptamalar taǵaıyndalyp, tekserý sharalary júrgizilýde.
