Túrkistan oblysynda bir kúnde 4 myńǵa jýyq adam tumaýǵa qarsy vaktsına aldy
TÚRKІSTAN. QazAqparat - Bıyl tumaýǵa qarsy vaktsına egý jumystary jyldaǵydan erte, ıaǵnı 15 qyrkúıekte bastaldy. Bir kúnde Túrkistan oblysy boıynsha 4000-ǵa jýyq azamat vaktsına qabyldaǵan, dep habarlaıdy QazAqparat oblys ákiminiń baspasóz qyzmetine silteme jasap.
Óńirdegi medıtsınalyq uıymdar sapaly ári tıisti zerthanalyq synaqtan ótken vaktsınamen qamtylǵanyn kórsetý úshin Túrkistan qalalyq ortalyq emhanasynyń basshylyǵy men qyzmetkerleri ekpeni ózderine birinshi bolyp saldyrdy.
Oblys ortalyǵyndaǵy emhanada bıyl 11 500 adamǵa ekpe salý josparlanǵan.
«Jylda kúz kelgende JRVI men tumaýdyń órshıtini málim. Biraq, bıyl halyqty vaktsınatsııalaý asa qajet. Óıtkeni koronavırýs ınfektsııasy tumaýmen qabattasyp, epıdemıologııalyq jaǵdaıdy asqyndyrýy múmkin», – deıdi Túrkistan qalalyq ortalyq emhanasy bas dárigeriniń orynbasary Serik Ábdiqulov.
Ekpe egý jumystarynyń alǵashqy kúninde emhanada 400-ge jýyq adamǵa tumaýǵa qarsy vaktsına salyndy. Onyń 166-sy - medıtsına qyzmetkerleri.
Vaktsına sozylmaly aýrýy bar 18 jasqa deıingi balalarǵa, medıtsına qyzmetkerlerine, júkti áıelder men balalar úıleri jáne mektep-ınternattarynyń tárbıelenýshilerine, múgedekter men sozylmaly aýrýy bar adamdarǵa, 60 jastan asqan qarııalarǵa tegin salynady.
Tumaýǵa qarsy josparly ekpe egý jumystary qarasha aıyna deıin jalǵasady.
