Túrkistan oblysynda bir kún ishinde 4 bala sýǵa ketip, qaıtys boldy
Oqıǵalar 9 shilde kúni bolǵan. Keles aýdany, Abaı aýylynyń 6 jasar turǵyny saǵat 12:00 shamasynda úıinen shyǵyp ketip qaıta oralmaǵan. Qasyndaǵy joldasy týystaryna Keles ózeniniń janyna birge barǵanyn aıtqan. Sodan TJD mamandary men polıtsııa qyzmetkerleri jáne jergilikti turǵyndar eni 10, tereńdigi 2 metr bolatyn Keles ózeninde izdeý jumystaryn júrgizdi. Al, saǵat 16:30 shamasynda TJD qyzmetkerleri jetkinshektiń máıitin sýdan shyǵardy.
Ekinshi oqıǵa Ordabasy aýdany, Shubarsý aýylynda boldy. Úlkenderdiń qaraýynsyz qalyǵan 2 jastaǵy búldirshin úı aýlasyndaǵy eni 0,5 metr, uzyndyǵy 1,5 metr, tereńdigi 0,6 metr bolatyn vannaǵa qulap, batyp ketken.
Úshinshi jaǵdaı Tólebı aýdany, Birkólik aýyly, «Alataý» demalys aımaǵynyń aýlasynda boldy. Eni 3 metr, uzyndyǵy 5 metr, tereńdigi 1,5 metr bolatyn basseınge 2 jastaǵy bala qulap ketken. Keıinnen búldirshinniń máıitin týystary sýdan shyǵaryp alǵan.
Tórtinshi jaǵdaı Jetisaı aýdanynda tirkeldi. Eni 3 metr, tereńdigi 1,2 metr bolatyn K-25-9 sýarmaly kanalyna 8 jastaǵy bala qulap, batyp ketken. Jergilikti turǵyndardyń kúshimen 10 shilde kúni túngi saǵat 00:41 shamasynda máıit sýdan shyǵaryp alynǵan.
«Barsha balanyń qaıtys bolý sebebi anyqtalýda. Sot medıtsınalyq saraptamasy taǵaıyndaldy. Túrkistan oblysy Tótenshe jaǵdaılar departamenti balalardy qaraýsyz qaldyrmaýdy, ruqsat etilmegen jerde sýǵa túspeýdi eskertedi» - delingen Túrkistan oblysy TJD baspasóz qyzmeti taratqan aqparatta.
