Túrkistan oblysynda bir aıda 860 kólik aıypturaqqa jetkizildi

TÚRKІSTAN. QazAqparat - Túrkistan oblysynda 17 mamyr men 16 maýsymy aralyǵynda «Qaýipsiz jol» jedel-profılaktıkalyq is-sharasy ótti. Reıd nátıjesimen 860 júrgizýshiniń kóligi aıypturaqqa qoıyldy, dep habarlaıdy QazAqparat tilshisi.

Jalpy, jol qozǵalysy erejesin buzýdyń 24 myńǵa jýyq faktisi anyqtalǵan.

Reıdke 500-ge jýyq patrýldik polıtsııa qyzmetkeri men ýchaskelik ınspektorlar, basqa da múddeli organdardyń ókilderi qatysqan.

Nátıjesinde mas kúıinde kólik júrgizgen 94 júrgizýshi ustalyp, qaýipsizdik beldigin taqpaǵany úshin 4718 júrgizýshige tıisti hattamalar toltyryldy. Qozǵalys kezinde telefondy paıdalanǵan 1774 júrgizýshi aıyppul tóleıtin boldy. Sondaı-aq, jyldamdyqty asyrǵany úshin - 753, manevr jasaý erejelerin buzǵany úshin 1020 adam ákimshilik jazaǵa tartyldy. Qarama-qarsy qozǵalys jolaǵyna shyǵýdyń - 68, baǵdarshamnyń tyıym salatyn sıgnalyna ótýdiń - 146 faktisi anyqtaldy.

Oǵan qosa tártip saqshylary jalǵan memlekettik nómiri bar 11 kólikti ustap, jol erejesin buzǵan 4153 jaıaý júrginshige qatysty ákimshilik hattama toltyrdy.

Sonymen qatar, tekserý barysynda patrýldik polıtsııa qyzmetkerleri qoǵamdyq kólik júrgizýshileri jasaǵan 27 jol qaýipsizdigi erejesin buzý oqıǵasyn anyqtady. Zańsyz qaıta jabdyqtaýdyń 254 deregin, reıs aldyndaǵy jáne medıtsınalyq tekserýden ótpeýge qatysty 8 jaǵdaıdy tirkegen.