Túrkistan oblysynda bilim bóliminiń qyzmetkerlerine zańsyz aqsha tólenip kelgen
Túlkibas aýdandyq bilim bólimi 46 qyzmetkerdiń eńbek aqylaryna qosymsha 5 myń teńgeden tólem júrgizip otyrǵan. Osylaısha 4 aı ishinde 5 mln teńge maqsatsyz jumsalǵany belgili boldy. Alaıda zań júzinde qosymsha tólem jumysshylarǵa eńbek jaǵdaılary zııandy jáne qaýipti jumystardaǵy eńbegi úshin tólenýi tıis. Prokýrorlar bilim bólimi qyzmetkerleriniń eńbek jaǵdaılaryn zııandy dep tanýǵa attestattaý mamandandyrylǵan uıymdarmen júrgizilmegenin anyqtady.
Prokýrorlyq qadaǵalaý aktisine sáıkes bıýdjetke 1 mln teńgeden astam zalal óndirilip, zańbuzýshylyqqa jol bergender tártiptik jaýapkershilikke tartylǵan.
Sondaı-aq osy aýdandaǵy orta mektepterde ekologııa zańnamasy men sanıtarlyq qaǵıdalardyń óreskel buzylýy anyqtaldy.
32 mekteptiń qoımasynnda jyldar boıy jaramsyz dep tanylǵan lıýmınestsenttik shamdar saqtalyp kelgen. Bul shamdar quramynda synaby bar (1-den 5 grammǵa deıin) energııa únemdeıtin qaýipti qaldyqtar tobyna jatqyzylady. Búginde 2 myńǵa jýyq lıýmınestsenttik jáne 100 shaqty dıodty shamdar bilim berý ǵımarattarynan shyǵarylyp tastaldy.
