Túrkistan oblysynda bilim berý salasy tolyǵymen tsıfrlandyrylýda

TÚRKІSTAN. QazAqparat - Túrkistan oblysynda bilim salasyndaǵy tsıfrlandyrý júıesi qarqyndy engizilýde. Jobalar bilim salasyndaǵy ashyqtyq pen qoljetimdilikke baǵyttalǵan. Búgin bul týraly Óńirlik kommýnıkatsııalar qyzmetinde ótken brıfıngte bilim basqarmasy basshysynyń orynbasary Ardaq Sadyqova málim etti.

Onyń aıtýynsha, «Tsıfrlyq Qazaqstan» memlekettik baǵdarlamasy aıasyndaǵy jobalar Janseıit Túımebaevtyń qoldaýymen júzege asyrylýda. Sondaı-aq elimizde alǵashqy bolyp qolǵa alynǵan.

Búginde oblysta 1371 mektepke deıingi bilim berý uıymynda 140 034 bala qamtylǵan.

«Qazirgi tańda «Mektepke deıingi bilim berý uıymdaryna joldama berý jáne kezekke qoıýdy avtomattandyrý» jobasyna - 481 mekeme, ıaǵnı 35 paıyzy qamtylǵan. Balabaqsha.sitcen.kz portalyna qosý arqyly 2018 jyldyń sońyna deıin bul kórsetkishti 100 paıyzǵa jetkizý josparlanýda. Sonymen qatar, aǵymdaǵy jyldyń shilde aıynan bastap oblystaǵy 902 mekteptiń barlyǵynda mektep.sitcen.kz portaly arqyly bilim berý uıymdaryna qujattardy qabyldaý syndy qyzmetter avtomattandyryldy. Atalǵan júıe Túrkistan oblysynyń barlyq aýdanyndaǵy mektepterde qosylyp, búgingi kúni júıe arqyly 54 751 oqýshy elektrondy túrde 1-shi synypqa qabyldandy», - dedi Ardaq Mádihanqyzy.

Aıta keterligi, júıeniń tıimdiligi ata-ana mektepke barmaı-aq, qalaǵan mektebine 1-shi synypqa qabyldaýǵa ótinish berip, ótinimniń qabyldanǵany týraly habarlama ala alady.