Túrkistan oblysynda bes aýylǵa tabıǵı gaz berildi

TÚRKІSTAN. QazAqparat - Túrkistan oblysynyń Jetisaı aýdanynda bir kúnde bes  aýylǵa tabıǵı gaz berildi. Atameken jáne Dostyq aýyldyq okrýgterinde ótken saltanatty rásimge  Túrkistan oblysynyń ákimi Janseıit Túımebaev arnaıy qatysyp, jergilikti turǵyndardyń qýanyshymen bólisti, dep habarlaıdy QazAqparat tilshisi.

Qoǵaly, Tyńdala, Baıdala, Zerdeli jáne  Dostyq eldime kenderine  kógildir otyn tartý jumystary ótken jyldyń qyrkúıek aıynda bastalǵan. Oblystyq bıýdjet esebinen júrgizilgen nysannyń jalpy smetalyq quny 102,6 mln teńgeni qurady. Aýyldarǵa gaz jetkizý  jumystarymen tanysqan aımaq basshysy aldaǵy ýaqytta ózge eldi mekender de kógildir otynmen qamtylatynyn atap ótti.

«Qazirgi tańda Jetisaı aýdanynda 104 eldi mekenniń 46-sy, ıaǵnı 22 096 abonent tabıǵı gazben qamtylsa, bul aýdandaǵy eldi mekenderdiń jalpy sanynyń 44,2 paıyzyn qurap otyr. Al abonent sany boıynsha 74,4 paıyzǵa jetti», - dedi Janseıit Túımebaev.

Aıta keteıik,  aǵymdaǵy jyly  Jetisaı aýdanyndaǵy eldi mekenderdi gazdandyrý maqsatynda 5 nysannyń qurylysyna oblystyq bıýdjetten 615,4  mln teńge qarastyrylǵan bolatyn.  Onyń ishinde 1 nysannyń qurylys-montaj jumystary 2018 jyldyń shilde aıynda aıaqtalsa, 3 eldi mekenniń qurylysy jyl sońyna deıin el ıgiligine tapsyrylady dep kútilýde.