Túrkistan oblysynda bes aýdannyń ınfraqurylymyn damytý sharalary júzege asyrylýda
Oblystyń aýdandary men eldi mekenderiniń damýyna oń serpin beretin 67 jobanyń 10-y Úkimet maquldaýynan ótip, 2021 jyly tıisti qarajat bólinetin boldy. Budan bólek, oblystyq bıýdjet esebinen 40 mlrd teńge qaralyp, 57 joba iske asyrylyp jatyr. Ol qarjynyń 30 mlrd teńgesi bıyl bólinse, 10 mlrd teńgesi kelesi jyly qarastyrylmaq. Atalǵan jobalardy júzege asyrý arqyly ınfraqurylymdar damytylyp, aýyldyq jerlerde mektep pen aýrýhanalar boı kóteredi. Jańadan joldar salynyp, keı jerlerde kósheler jóndeledi. Gaz qubyrlary tartylady. Keshendi josparǵa sáıkes, negizgi basymdyq halyq sany 1 mıllıonǵa jýyqtaıtyn ońtústik aımaqtyń áleýmettik ınfraqurylymyn damytýǵa berilip otyr. Bes aýdanda qolǵa alynǵan jumystardyń júzege asyrylýyn óz baqylaýyna alǵan óńir basshysy Ómirzaq Shókeev Saryaǵash, Keles aýdandaryn aralady. Jumys saparyn Jibek joly aýyldyq okrýgindegi «Bes juldyz» balabaqshasynan bastaǵan oblys ákimi bilim mekemesiniń ujymymen jáne quryltaıshysymen kezdesti. 550 búldirshinge laıyqtalǵan balabaqshada karantındik shekteýler kezinde nebári 60 bala tórt topta tárbıelenip otyr. Árqaısysyna «Balapan» baǵdarlamasymen tıisti qarjylar tólenýde.
Munan soń aımaq basshysy elimizde balamasy joq kóshet ósiriletin jylyjaı kesheniniń jumysymen tanysty. Zortóbe eldi mekeninde ornalasqan keshenniń aýmaǵy - 12,85 ga quraıdy. Ozyq tehnologııalardy paıdalanatyn jylyjaıda jylyna 12 mln dana kóshet ósirilip, satylymǵa shyǵarylady. 600 mln teńge kóleminde ınvestıtsııa salynǵan nysanda kásipker óz qarjy esebinen ortalyqtandyrylǵan jylytý qazandyǵyn ornatqan. Ol Ómirzaq Shókeevke memleket tarapynan sýbsıdııa retinde qoldaýlar bolsa, óndirisin keńeıtkisi keletinin jetkizdi. Sóıtip aýyl turǵyndaryn turaqty jumyspen qamtı alatynyn atap ótti.
Óńir basshysy Yntymaq eldi mekeninde Keles ózeniniń ústinen salynǵan kópirdiń qurylysyn da aralap kórip, jergilikti halyqpen sóılesti. Uzyndyǵy 60 metr, al eni 10 metr bolatyn ótkel úsh aı kóleminde salynyp, qyrkúıek aıynda paıdalanýǵa berilgen. Osy kópirdi salý arqyly eki aýylǵa qatynaý jeńildep, 15 shaqyrymdyq jol eki shaqyrymǵa qysqarǵan. Jergilikti halyq bılik ókilderine aýyl arasyndaǵy joldardyń jóndelip, kópirdi salyp bergenine alǵystaryn jetkizdi.
Sonymen qatar Keles aýdanyna jasaǵan sapar barysynda óńir basshysy Abaı aýylynda «Aýyl - el besigi» baǵdarlamasy aıasynda jóndeýden ótken kóshelerdi kórip, Jambyl aýylyndaǵy № 29 jalpy orta mektebiniń qurylysymen tanysty. Nysan qurylysy 2021 jyldyń tamyz aıynda aıaqtalady dep josparlanyp otyr.
