Túrkistan oblysynda baılanys operatorlarynyń stantsııalary jańartyldy

TÚRKІSTAN. QazAqparat - Túrkistan oblysynda «Qazaqtelekom» jáne «Transtelekom» aktsıonerlik qoǵamdary tarapynan memlekettik-jekeshelik áriptestik jobasy boıynsha talshyqty-optıkalyq ınternetti paıdalaný jobasy iske asyrylǵan. Búl joba elimizde alǵash ret qolǵa alynýda, dep habarlaıdy QazAqparat tilshisi.

Jyl basynan beri osy mehanızm arqyly jeke ınvestor «NanoTech» JShS oblys kóleminde 70-ke jýyq eldimeken turǵyndaryn ınternetpen qamtydy. Keler jyly 30 myńǵa jýyq turǵyn úı, ıaǵnı, 150 myńǵa jýyq tutynýshy osy tásil arqyly ınternetke qol jetkizedi dep kútilýde. Bul týraly Túrkistan oblysy ákimdiginiń apparat otyrysynda aıtyldy. Oblys ákimi Ómirzaq Shókeev óńirdi tsıfrlandyrý baǵytyndaǵy jumystarmen tanysyp, tıisti basqarma basshysynyń esebin tyńdady.

Oblystyq tsıfrlandyrý, memlekettik qyzmetter kórsetý jáne arhıvter basqarmasynyń basshysy E.Ótebaevtyń aıtýynsha, óńirde ǵalamtormen qamtý men tsıfrlandyrý baǵytynda mańyzdy jobalar júzege asyp jatyr. Bıyl oblysta «Ksell» aktsıonerlik qoǵamy tarapynan 58 eldimeken mobıldi keń jolaqty ǵalamtormen qamtylǵan.

Sonymen birge qoldanystaǵy 2G jáne 3G stantsııalaryn 4G-ge aýystyrý jumystary júrgizilýde. Atap aıtar bolsaq, «Ksell» baılanys operatory oblys boıynsha qoldanystaǵy 22 bazalyq stantsııasyn 4G-ge aýystyrsa, Túrkistan qalasynda qosymsha 3 jańa stantsııa ornatqan. Al, 6 stantsııany 4G-ge aýystyrdy. «Bılaın» baılanys operatory 30 stantsııasyn 4G-ge aýystyrsa, «Tele2» baılanys operatory oblys boıynsha qoldanystaǵy 214 stantsııasyn 4G-ge kóshirgen.

Respýblıka boıynsha tuńǵysh ret Túrkistan qalasynda besinshi býyndy 5G mobıldi ınterneti iske qosylǵan. «Qazaqtelekom» AQ-men birlesken jumys nátıjesinde Túrkistan qalasynda «Smart city» jobasy 2 kezeńmen júzege asady. Bul baǵytta turaqty jumystar júrgizilýde. Joba júzege assa, qaladaǵy kóptegen salalar tsıfrlanyp, tirshilik jeńildeı túspek.

Memleket basshysy Qasym-Jomart Toqaevtyń tapsyrmasyna sáıkes oblystaǵy 943 mekteptiń 563-i oblystyq polıtsııa departamentiniń jedel baqylaý ortalyǵyna shyǵaryldy. Búgingi tańda Túrkistan qalasyndaǵy kóterme-taratý ortalyǵynyń tsıfrlyq platformasy ázirlendi. Bul saladaǵy jumystardy saralaǵan Ómirzaq Shókeev eldi mekenderdi sapaly ınternetpen qamtý jumysyn jandandyrýdy, tsıfrlandyrý boıynsha jobalardy sapaly atqarýdy tapsyrdy.