Túrkistan oblysynda bastaýysh synyp oqýshylaryna kezekshi toptar ashylýy múmkin
TÚRKІSTAN. QazAqparat – Túrkistan oblysynda bastaýysh synyp oqýshylary sanynyń artýyna baılanysty kezekshi toptar ashylýy múmkin. Bul týraly Óńirlik kommýnıkatsııalar qyzmetinde ótken brıfıngide oblystyq Adamı áleýetti damytý basqarmasynyń basshysy Raqymbek Jolaev málimdedi, dep habarlaıdy QazAqparat tilshisi.
Raqymbek Jolaevtyń aıtýynsha, óńirdegi 910 mektepte 499 535 bala oqıdy. Al, 1 synyp oqýshylary bıyl 1 tamyzǵa deıin eGov.kz portaly arqyly tirkeledi. Sondyqtan oqýshylar sany arta túspek. Qazirgi tańda 2020-2021 jańa oqý jylyn qashyqtyqtan oqytýǵa daıyndyq júrgizilip jatyr. Osyǵan oraı, oqý protsesin uıymdastyrýdyń túrleri jan-jaqty qarastyrylýda.
«Oqý jylyndaǵy birinshi toqsan shalǵaıda ornalasqan shaǵyn jınaqy aýyldy mektepterdi qospaǵanda, oblys aýmaǵyndaǵy barlyq mektepterde 1-11 synyp oqýshylary qashyqtan oqytylady. Oblysta shaǵyn jınaqy mektepter sany – 139, ondaǵy oqýshy sany 12 378. Egerde atalǵan mektepter ornalasqan eldi mekenderde indetten qaýip joq bolsa, sanıtarlyq epıdemııalogııalyq qyzmettiń ruqsatymen dástúrli túrde oqytylatyn bolady», - dedi basqarma basshysy.
Sonymen qatar oblystaǵy ahýal jaqsarǵan jaǵdaıda qalǵan mektepterde bastaýysh synyp oqýshylary ata-analarynyń ótinishimen kezekshi synyptardyń jumys isteýine múmkindik beriledi. Aldaǵy ýaqytta elimizdegi ahýal durystalyp, qaýiptiń seıilgenine kóz jetkizgen kezde mektepterdi birtindep aralas oqytý jáne shtattyq formatta oqytýǵa kóshirý júrgiziletin bolady.
«Ustazdar men oqýshylardyń úı jaǵdaıyndaǵy qashyqtyqtan oqytý múmkindikteri de qarastyrylýda. Oblysta 499 535 oqýshy bolsa, bul 200 myńnan astam otbasynyń balalary. Jasalǵan taldaý qorytyndysy boıynsha, oblystaǵy 28% otbasy úı jaǵdaıynda ınternet jelisine qosyla almaıdy (130 myńǵa jýyq oqýshy); al 34% otbasynda kompıýterlik tehnıka joq (60 myńnan astam oqýshy). Qazirgi tańda, osy oqýshylardy ınternetpen jáne kompıýtermen qamtamasyz etý máselesi boıynsha jumystar atqarylýda. Mektepterdegi tehnıkalar kelisimmen ýaqytsha paıdalanýǵa beriletin bolady», - dedi Raqymbek Jolaev.
Budan ózge, oblystaǵy 65 kolledj jańa 2020-2021 oqý jylynda da qashyqtyqtan bilim berýdi júzege asyrý josparlanyp otyr. Sonymen qatar, qazirdiń ózinde halyqtyń densaýlyǵyna qaýip tóndirmeý úshin kolledjderge oqýǵa túsetin talapkerlerden qujat qabyldaý elektrondy túrde e.gov.kz portaly arqyly júrgizilýde. Kolledjderde oqýǵa túsý boıynsha kez kelgen suraqqa jaýap alý úshin vırtýaldy qabyldaý bólmeleri iske qosylýda.
