Túrkistan oblysynda bastalǵan «Qamqorlyq» jobasyn ózge óńirler de qoldady

TÚRKІSTAN. QazAqparat - «Qamqorlyq» jobasy elimizde etek jaıa bastady. Úlgi alarlyq sharaǵa ózindik úlesin qosqan Aqtóbe oblysynyń turǵyny Gúlbaram Qabylanqyzy Jetisaı aýdanyna arnaıy kelip qaıyrymdylyq jasady, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.

«Ultymyzdyń jaqsy qasıetteriniń asyly-jomarttyq, keńpeıildilik. Túrkistan oblysynda «Qamqorlyq» baǵdarlamasynyń baryn estip, az da bolsa muqtaj jandarǵa kómegim bolsyn, dep sheshtim. Búgin bar dúnıe erteń joq. Balalarymnyń bári qoldady», – deıdi aq jaýlyqty ana.

Úlken shańyraqtyń otanasy aýyldaǵy muqtaj jandarǵa eki bas iri qara soıyp, 30-ǵa jýyq otbasyna taratty. Odan bólek Jetisaı qalasy men Asyq-ata kentinde ornalasqan balalarǵa arnalǵan eki ońaltý ortalyǵynyń tósek-ornyn túgeldeı jańartyp, qajetti turmys jıhazdaryn syıǵa tartty.

Sondaı-aq, baǵdarlama aıasynda taǵy bir shańyraq shattyqqa bólendi. Sozaq aýdany, Qumkent aýyldyq okrýgine qarasty Qyzylkól eldi mekeniniń turǵyny Shegebaı Sarybaevqa aýyldasy, jeke kásipker Sáken Áshirmetov kólemi 120 sharshy metr bolatyn 6 bólmeli úı alyp berip, muqtaj jandy qýantty. Jaqynda zeınetke shyqqan aqsaqaldyń otbasyndaǵy alty jan jyldar boıy dym tartqan aıadaı ǵana bólmeni panalap kelgen. Osyny eskergen aýdan ákimdigi «Qamqorlyq» jobasy aıasynda demeýshi taýyp, januıanyń baspanaly bolýyna qolǵabys etti.

«Ózgelerge úlgi eterlik erekshe baǵdarlama Nur Otan partııasynyń bastamasymen júzege asyp, ómirlik qıyn jaǵdaıǵa tap bolǵan otbasylardy kedeılik deńgeıinen shyǵýǵa yqpal etedi. Turmystyq jaǵdaıy tym tómen 7 myńǵa jýyq adam, ıaǵnı, 1643 otbasy jan-jaqty kómekpen qamtylýda. Baǵdarlama bılik pen qoǵam arasyndaǵy qarym-qatynasty nyǵaıtýǵa sep bolǵany anyq»,-delingen habarlamada.