Túrkistan oblysynda baspanasyz qalǵan kópbalaly anaǵa jergilikti bılik kómektespek
TÚRKІSTAN. QazAqparat - Túrkistan oblysyna qarasty Maqtaral aýdanynda bes balasymen baspanasyz qalǵan kelinshek Túrkistan qalasyna kelgen. Kóshe kezip, kimnen kómek suraryn bilmeı júrgen ananyń jaǵdaıy áleýmettik jelilerge tez tarap ketken bolatyn, dep habarlaıdy QazAqparat tilshisi.
Túrkistan qalasy turǵyndarynyń biri Jansaıa Shorabekova kesh túskende ıAsaýı kesenesi mańynda sendelip júrgen balaly áıeldi kórip, úılerine panalatqanyn áleýmettik jelidegi paraqshasyna jazǵan edi.
Onyń aıtýynsha, júzinen taǵdyr taýqymetin ábden tartqan jas kelinshek bes balanyń anasy bolyp shyqqan. Janar Oraqbaeva Maqtaaral aýdanynyń Slavıanka aýylynan oblys ákimi Janseıit Túımebaevqa jolyǵýǵa arnaıy kelgen. Segiz saǵat jol júrip, Túrkistanǵa áreń jetken áıel kóshede júrip nár tatpapty. Qolyndaǵy uly da ábden qaljyraǵan.
«Kúıeýim 8 aı buryn jol apatynan qaıtys boldy. Páter jaldap turatyn edik, aqysy tólenbegen soń shyǵaryp jiberdi. Qazir barar jerim, mekender baspanam joq. Keıde balalaryma isher as turmaq, sýǵa jibitip berer qatqan nan tappaı qalamyn» dep eńiregende etegi tolady.
«Qınalǵan soń qańǵyp kettim ǵoı. Balalardy balalar úıine ótkizsem be? dep te oılaımyn. Ashtan qatsaq, obalyn kim kóteredi? Tórt qyzdan soń kórgen ulymnyń júreginde aqaý bar. Kúıeýimniń jalǵyz tuıaǵy ǵoı dep, tapqanymdy osy balanyń emine jumsaımyn. Kishi qyzym mektepke jyrtyq etikpen barmaımyn, bári mazaqtaıdy dep jylasa, odan úlkeni qınalǵanymdy kórip «mama, bizdi týmaı-aq qoımadyńyz ba» dep muńaıady. Birde ómirden túńilip ketip, yzamen sirkesý iship qoıdym. Aman qaldym. Qaısy birin aıta bereıin? Búgin jumys ýaqyty aıaqtalǵanda jetippin. Erteń jolyǵatyn shyǵarmyn»,- dep bes balanyń anasy muńyn shaqqan.
Bul jaıttan habardar bolǵan oblys ákimi Janseıit Túımebaev búgin tıisti organdar men basshylarǵa tapsyrma bergeni málim boldy. Bul týraly oblystyq Іshki saıasat basqarmasy málim etti.
«Búgin, ıaǵnı 17 qańtar kúni oblys ákimi Janseıit Túımebaevtyń tapsyrmasy boıynsha Jansaıa Shorabekova men kópbalaly anany oblys ákiminiń orynbasary Otarbaev Málik Nurjanuly qabyldady. Bir otbasynyń jaı-kúıine qanyqqan Málik Nurjanuly tıisti sharalar jasaıtynyn alǵa tartty. Anyqtalǵandaı, azamatsha Oraqbaeva Janar Asqarqyzy Qazaqstan azamaty bolyp tabylmaıdy. Sol sebepti de memleket tarapynan beriletin áleýmettik kómekterge qol jetkize almaı otyr. Jary qaıtys bolǵandyqtan, qazirgi tańda 5 balasyn asyraý qıynǵa túsken. Sondyqtan da bul máselemen tıisti oryndar men Maqtaaral aýdanynyń ákimdigine naqty tapsyrma berildi. Eń aldymen, aýdan ákimdigi anaǵa tıisti materıaldyq kómekter berip, azyq-túlik jáne kıim-keshekpen qamtamasyz etetin bolady. Bul turǵyda demeýshiler de óz kómekterin berýge daıyn.
Oblys ákimi Maqtaaral aýdany men aýdan ákimi Baqyt Asanovqa anasy men bes balasyna qujat jasaý rásimin jedeldetýdi tapsyrdy.
«Memlekettik turǵyn úı qorynan turǵyn úıge nemese jeke turǵyn úı qorynan jergilikti atqarýshy organ jaldaǵan turǵyn úıge muqtaj Qazaqstan Respýblıkasynyń azamattaryn esepke qoıý qaǵıdalaryn bekitý týraly» Qazaqstan Respýblıkasy Úkimetiniń 2012 jylǵy 26 maýsymdaǵy №856 Qaýlysynda kórsetilgen talaptarǵa sáıkes, azamattyqty alǵan soń J. Oraqbaeva kóp balaly otbasy jáne tolyq emes otbasy sanattary boıynsha úı kezegine tura alady. Kóp balaly ananyń jaı-kúıi oblys basshylyǵynyń turaqty nazarynda bolady», delingen habarlamada.
Sondaı-aq, Maqtaraldyq kelinshektiń naýqas balasyna Túrkistandaǵy HQTÝ klınıkasy basshylyǵy tegin medıtsınalyq kómek kórsetýge daıyn ekendikterin jetkizgen. Áleýmettik jeli qoldanýshylary da qarap qalmaı, qoldan kelgen kómekterin jaýdyrdy. Osylaısha Janar Oraqbaeva jany jomart azamattardyń qarjylyq kómegin alyp, óz aýylyna qaıtty.
