Túrkistan oblysynda bas shyrshanyń shamy jaǵyldy
NUR-SULTAN. QazAqparat - Túrkistan oblysynyń ákimi Ómirzaq Shókeev pen qala ákimi Rashıd Aıýpov shahardaǵy bas shyrshanyń shamyn jaqty, dep habarlaıdy oblystyq ákimdiktiń baspasóz qyzmeti.
Qala ortalyǵyndaǵy «Gúlder» saıabaǵynda boı kótergen jańajyldyq shyrshaǵa túrkistandyqtar men qala qonaqtary jınaldy.
«Jańa jyl – bizder, jastar, búldirshinder asyǵa kútetin otbasylyq meıram. Sondyqtan, biz balalar jaqsy kóretin merekede shyrshany ornattyq. Ózderińizge belgili, Elbasy Jarlyǵymen qabyldanǵan sheshim aıasynda Túrkistan túlep jatyr. Keler jyly shaharymyzǵa Ortalyq Azııa elderiniń basshylaryn shaqyryp, Túrkistandy álemge pash etpekpiz. Munyń bári sizder, bolashaq urpaq úshin jasalyp jatqan dúnıe. Endeshe, jańa jyl barshamyzǵa jaqsylyq ákelsin! Árbir bastaǵan jumystarymyz tabysty aıaqtalyp, yntymaǵymyz nyǵaıa bersin!» – degen lebizin bildirgen Ómirzaq Estaıuly jınalǵan balalarǵa 700-den astam syılyq taratty.
Merekelik sharada Aıaz ata men aqshaqarlar merekelik sherý uıymdastyryp, ertegiler áleminiń ártúrli keıipkerleri balalarmen án shyrqap, bı bıledi. 20 metrlik alyp shyrshada 2000-daı oıynshyqtar men jaryqshamdar ornatylǵan. Bıyl jańajyldyq shyrsha shahardaǵy «Gúlder» alańy men «Jeńis» saıabaǵyna ornatylǵan. Jańa jyl sımvoly osydan 3 jyl buryn memlekettik satyp alý tásilimen alynǵan.
Túrkistan qalasyndaǵy negizgi merekelik is-sharalar 29 jeltoqsan kúni «Jeńis» saıabaǵynda ótpek. Kúrdeli jóndeýden keıin paıdalanýǵa berilgen jańa baqta erekshe formattaǵy merekelik kontsert josparlanyp otyr. Saltanatty shara áserli otshashýmen aıaqtalady.
