Túrkistan oblysynda barymtashylardan kelgen shyǵyn 150 mln teńgeden asqan
TÚRKІSTAN. QazAqparat – Túrkistan oblysynda polıtseıler úsh aýdanynyń aýmaǵynda uzaq ýaqyt boıy mal urlyǵymen aınalysqan qylmystyq toptyń múshelerin ustady. Tergeý barysynda ustalǵandardyń 14 mal urlyǵy jáıtyna qatysy bar ekeni anyqtaldy, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, kúdiktiler ótken jyly bir jábirlenýshiden 12 mln teńge turatyn 25 jylqysyn qoldy ketken. Osydan keıin barymtashylardy ustaý maqsatynda Túrkistan oblysynyń PD-niń krımınaldyq polıtsııa, tergeý jáne jergilikti polıtsııa qyzmetiniń tájirıbeli qyzmetkerlerinen arnaıy jedel-tergeý toby quryldy. Tártip saqshylary jaqyn mańdaǵy barlyq aýmaqtardy aralap, úı maldaryn satý jáne soıý oryndary men sharýa qojalyqtarynyń jaıylymdardy tekserdi. Jedel ýákilder jınalǵan aqparat kózderi negizinde atalmysh mal urlyqtaryn bir qylmystyq toptyń isteýi múmkin degen boljam jasaǵan. Jedel izdestirý sharalarynyń nátıjesinde osy qylmysqa qatysy bar degen Qazyǵurt aýdanynyń eki turǵyny ustaldy. Onyń biri buryn sotty bolǵany anyqtalǵan. Tergeý barysynda jedel ýákilder taǵy da qylmystyq toptyń ózge músheleriniń izine túsip, olardyń urlanǵan jylqylardy satyp alýshylar ekenin anyqtaǵan. Jaýap alý barysynda, barymtashylar Qazyǵurt, Tólebı jáne Saryaǵash aýdandarynyń jaıylymdarynan urlanǵan jylqylardy qoralarynda jasyryn baǵyp otyrǵanyn aıtqan. Sóıtip, olardyń syrǵalaryn aýystyrǵany jáne bazarlarǵa nemese etke ótkizip otyrǵany belgili bolǵan. Jábirlenýshilerge keltirilgen shyǵynnyń jalpy kólemi 150 mıllıonnan astam teńgeni qurady. Aıǵaqty zat retinde polıtseıler 70-ten astam jylqyny tárkilep alyp, zańdy ıelerine qaıtarǵan. Sondaı-aq, jedel ýákilder kúdiktilerdiń biriniń úıinen 2 dana qarý men 8 túp qarasora tapqan.
«Atalǵan jaıttarǵa baılanysty QR QK-niń 3 babymen sotqa deıingi tergeý amaldary júrgizilýde: 188-bap «Urlyq«, 287-bap «Qarýdy, oq-dárilerdi, jarylǵysh zattar men jarylǵysh qurylǵylardy zańsyz satyp alý, berý, ótkizý, saqtaý, tasymaldaý nemese alyp júrý« jáne 300-bap «Quramynda esirtki zattary bar ósirýge tyıym salynǵan ósimdikterdi zańsyz ósirý«.
Bes kúdiktiniń 2-eýi qamaýǵa alyndy, 1-eýi kepilmen shyǵaryldy, 2-eýi qolhatta. Tergeý amaldary júrgizilýde jáne mal urylarynyń basqa da osyǵan uqsas qylmystarǵa qatystylyǵy anyqtalýda. Qazirgi tańda qylmystyq is Túrkistan oblysy PD-niń óndirisinde jáne departament bastyǵynyń qatań baqylaýynda» delingen habarlamada.
