Túrkistan oblysynda barymtashylar ustaldy
ASTANA. QazAqparat - Túrkistan oblysynda barymtashylar ustaldy. Bul týraly búgin brıfıng barysynda QR ІІM resmı ókili Almas Sadýbaev aıtty, dep habarlaıdy QazAqparat tilshisi.
«Túrkistan oblystyq ІІD krımınaldyq polıtsııa qyzmetkerleri júrgizgen arnaıy operatsııa barysynda mal urlyǵymen aınalysqan uıymdasqan qylmystyq toptyń áreketi áshkere boldy. Uıymdasqan qylmystyq toptyń 5 múshesi dalada jaıylyp júrgen 20 jylqyny urlaý ústinde ustaldy», - dedi resmı ókil.
Onyń aıtýynsha, jedel izdestirý sharasy barysynda toptyń qylmystyq áreketteriniń syzbasy anyqtalyp, árbir múshesiniń róli aıqyndalǵan. Urylar arasynda aldyn ala kelisimniń de bar ekendigi naqtylanǵan.
«Olarǵa Túrkistan oblysynyń birqatar aýdanynyń aýmaǵynda 26 mal urlyǵyn jasady degen kúdik keltirilip otyr. QR Qylmystyq kodeksiniń «Uıymdasqan qylmystyq top qurý jáne oǵan jetekishilk etý» jáne «Asa iri kólemde urlyq jasaý» baptary boıynsha sotqa deıingi tergeý amaldary júrgizilýde», - dedi Almas Sadýbaev.
Sondaı-aq ol Túrkistan oblysynyń Arys aýdanynda da mal urlyǵymen aınalysqan qylmystyq toptyń áreketi áshkere bolǵanyn atap ótti.
