Túrkistan oblysynda balalarǵa arnalǵan psıhologııalyq-pedagogıkalyq túzetý kabıneti ashyldy

Atalǵan ortalyq «Dara» qorynyń, «Samruk-KazynaTrust» áleýmettik jobalardy damytý qorynyń jáne Túrkistan oblysy adamı áleýetti damytý basqarmasynyń seriktestigi nátıjesinde júzege asyryldy, dep habarlaıdy QazAqparat tilshisi.

Munda árbir bala men onyń otbasy defektolog, psıholog, logoped, sýrdopedagog mýzykalyq-yrǵaqtyq sabaqtaryna qatysady. Olar psıhologııalyq damýyna qoldaý kórsetetin basqa da mamandar tobynan bilikti kómek ala alady. Qajetti zamanaýı qural-jabdyqtarmen qamtylǵan ortalyqta emdik dene shynyqtyrýǵa arnalǵan keshender men montessorı bólmesi, balama kommýnıkatsııa quraldary bar. Sondaı-aq, dıdaktıkalyq jáne ádistemelik materıaldar jáne balanyń damýyna jan-jaqty baǵa berýge jáne ótkiziletin sabaqtardyń tıimdiligine monıtorıng júrgizýge múmkindik beretin baǵdarlamalyq qamtamasyz etý de bar.

«Psıhologııalyq-pedagogıkalyq túzetý kabınetterin ashý (PPTK) – ınklıýzıvti qoǵam qurý jolyndaǵy mańyzdy qadam. Jyl saıyn bir túzetý kabıneti ártúrli dıagnozdary bar 150-den astam balaǵa qyzmet kórsete alady. PPTK-de balalar men olardyń otbasylaryna qyzmetter tegin kórsetiledi. Bizdiń Qordyń qoldaýymen búkil Qazaqstan boıynsha, Qarabulaqta ashylǵan PPTK-ni qosa alǵanda 15 túzetý kabıneti jáne 16 resýrstyq ortalyq ashyldy», – deıdi «Samruk-KazynaTrust» qorynyń resmı ókili Mıras Іrgebaev.

Túrkistan oblysy adamı áleýetti damytý basqarmasynyń málimetinshe, Saıram aýdanynda erekshe bilim berý qajettiligi bar 3552 bala turady. Onyń ishinde 1 676-sy múmkindigi shekteýli bala.