Túrkistan oblysynda balalardyń terezeden qulap, sýǵa batý oqıǵalary alańdatyp otyr
TÚRKІSTAN. QazAqparat – Túrkistan oblysynda jyl basynan beri alty bala sýǵa batyp ketken. Bul týraly Óńirlik kommýnıkatsııalar qyzmetinde ótken brıfıngte oblystyq Tótenshe jaǵdaılar departamentiniń aǵa ofıtseri Oraz Aıtqulov málimdedi, dep habarlaıdy QazAqparat tilshisi.
Ol keltirgen málimetterge qaraǵanda, óńirde turǵyndar sýda qaýipsizdik erejelerin saqtamaıdy jáne arnaıy belgilenbegen jerlerde shomyla beredi. Sonyń saldarynan bıylǵy jyldyń ózinde 8 adam sýǵa batyp ketti, olardyń ishinde 2 - 8 jas aralyǵyndaǵy balalar bolǵan. Jetkinshekterdiń ólimine olardy ata-analarynyń qaraýsyz qaldyrýy sebep bolǵan.
«Ótken jyly 48 adam sýǵa batyp, qaıtys boldy. Olardyń 18-i balalar. Taldaý kórsetkendeı, qaıǵyly jaǵdaılardyń barlyǵy qutqarýshylar kúzetpeıtin jerlerde bolǵan. Oblysymyzda resmı túrde tirkelgen 110 demalys orny bar. Ol jerlerde qutqarýshylar jumys isteıdi. Sonymen qatar, sý aıdyndarynda oblys turǵyndarynyń qaýipsizdigin qamtamasyz etý úshin sýda júzýge tyıym salynǵan 268 belgi, 49 qaýipsizdik erejeleri kórsetilgen jarnamalyq bılbordtar ornatyldy. 12 demalys aımaǵynyń ıeleri memorandýmǵa qol qoıdy», – dedi Oraz Sheralyuly.
Departament ókiliniń sózinshe, aımaqta balalardyń úılerdiń terezelerinen qulap ketý jaǵdaılary da jıilep ketti.
«Balalardyń kópqabatty úılerdiń terezesinen qulaý jaǵdaılary jıiledi. Ókinishke qaraı, mundaı oqıǵalardyń sońy kóbine qaıǵyly jaǵdaıǵa dýshar etip jatady jáne olar negizinen eresekterdiń balalardy nazardan tys qaldyrýy saldarynan bolady. Máselen, Túrkistan oblysynda ótken jyly osyndaı 3 oqıǵa tirkelip, 8 jáne 4 jastaǵy balalar terezeden qulap, jaraqat aldy. Al 1 jasar búldirshin oqıǵa ornynda mert boldy. Mundaı oqıǵalardyń aldyn alý úshin ata-analar balalaryna baqylaýdy kúsheıtýi qajet», – dedi Oraz Aıtqulov.
