Túrkistan oblysynda balalar qaýipsizdigine arnalǵan sharalar ótip jatyr

ShYMKENT. QazAqparat - Túrkistan oblysynda tótenshe jaǵdaılar departamentiniń uıymdastyrýymen balalar qaýipsizdigine arnalǵan sharalar ótip jatyr. Departament qyzmetkerleri bir aı kóleminde azamattyq qorǵaý salasyndaǵy biliktilikti nasıhattap, oqýshylarǵa qaýipti jaǵdaıda ózin-ózi ustaý erejelerin úıretpek, dep habarlaıdy QazAqparat tilshisi.

Óńirlik TJD bastyǵynyń orynbasary Raýan Óserbaevtyń sózinshe, atalǵan shara 30 naýryzǵa deıin barlyq aýdan, qalalarda jalǵasady.

«Halyqaralyq Azamattyq qorǵanys uıymynyń qararyna sáıkes, kóktemniń alǵashqy kúni 1 naýryz Búkilálemdik Azamattyq qorǵanys kúni bolyp bekitilgen. Bul boıynsha Túrkistan oblysy tótenshe jaǵdaılar departamenti tarapynan arnaıy jospar ázirlengen. Qazirgi tańda oblystaǵy barlyq bilim uıalarynda jáne mektepke deıingi bilim mekemelerinde aılyq is-sharalar ótkizilýde. Túrli apattardan qorǵanýda bul jumystardyń paıdasy mol», - dedi Raýan Óserbaev.

Azamattyq qorǵanysty nyǵaıtýǵa baǵyttalǵan sharada oqýshylar estafeta, ınteraktıvti sabaqtar jáne seısmıkalyq jattyǵýlarǵa qatysyp, tehnıkalar men avarııalyq qutqarý quraldarynyń kórmesimen tanysýda.

Interaktıvti sabaqta balalar azamattyq qorǵanys, órt qaýipsizdigi jáne jalpy azamattyq qorǵaý salasyndaǵy kóptegen jańashyldyqtardy úırenip jatyr. Estafeta kezinde oqýshylar órt qaýipsizdigi, radıatsııalyq, hımııalyq jáne bıologııalyq qorǵanys, azamattyq qorǵaý salalaryndaǵy bilimderin, sporttyq qabiletterin kórsetýde. ıAǵnı, órt sóndirgishti durys paıdalaný, jaraqat alǵan adamǵa birinshi kómek kórsetý, gazqaǵardy qoldaný sııaqty estafetanyń synaqtarynan ótýde.

Sondaı-aq, jer silkinisi kezindegi is-áreketti jetildirý maqsatynda mektep muǵalimderi men oqýshylaryna seısmıkalyq jattyǵýlar ótkizildi. Onda apat kezinde mektep ǵımaratynan adamdardy kóshirý, zardap shekkenderge alǵashqy medıtsınalyq kómek kórsetý is-áreketterin pysyqtady.