Túrkistan oblysynda balabaqshalar jumysyn toqtatty
TÚRKІSTAN. QazAqparat - Túrkistan oblysynda balabaqshalar jumysyn toqtatty, dep habarlaıdy QazAqparat oblys ákiminiń baspasóz qyzmetine silteme jasap.
Oblys ákimi Ómirzaq Shókeevtiń tótenshe jaǵdaı rejimin qamtamasyz etý jónindegi óńirlik komıssııa otyrysyndaǵy qaýlysy negizinde 20 naýryzdan bastap barlyq balabaqshalar jumysyn ýaqytsha toqtatty. Buǵan deıin olar shtattyq rejimge sáıkes jumys istep kelgen. Balalar ata-analarynyń qalaýy boıynsha qabyldanǵan. Eldegi tótenshe jaǵdaı jarııalanǵannan keıin baqshadaǵy balalardyń sany eki ese azaıǵan.
Búkil álemdi alańdatqan koronavırýs indetine baılanysty saqtyq sharasy júzege asyp, Túrkistan oblysy boıynsha balabaqshalardan bosaǵan 150 myńnan astam bala úı tárbıesinde bolady. Al, mektepke deıingi bilim berý uıymdarynyń qyzmetkerleri jyldyq josparyna sáıkes kezekti eńbek demalysyna shyǵady. Qalǵany eńbek aqysy saqtala otyryp, demalysqa jiberildi.
Jumys toqtaǵanymen balabaqshalarda josparly túrde barlyq talapqa saı qaýipti vırýsqa qarsy saqtyq sharalary jaýapty sala mamandary tarapynan qadaǵalanyp otyrady. Qazirgi tańda oblysta mektepke deıingi bilim berý mekemeleriniń sany - 1 447. Onyń 998-i jekemenshik.
