Túrkistan oblysynda «Baqytty otbasy» baǵdarlamasy boıynsha 400-den astam páter bólindi

TÚRKІSTAN. QazAqparat - Túrkistan oblysynda «2-10-20» áleýmettik «Baqytty otbasy» baǵdarlamasyna qujat qabyldaý bastaldy, dep habarlaıdy QazAqparat óńir basshysynyń baspasóz qyzmetine silteme jasap.

Túrkistan oblysy turǵyndaryna ózi turatyn aımaqtan, aýdan ortalyqtary ne Túrkistan, Kentaý qalalarynan baspana satyp alýǵa múmkindik berildi. Shart boıynsha, bolashaq úı ıesiniń jáne birge turatyn otbasy músheleriniń atynda baspana bolmaýy tıis.

Tabysy tómen otbasylarǵa turǵyn úı satyp alýǵa arnalǵan nesıelendirý baǵdarlamasyna úı kezeginde turǵan kópbalaly otbasylar, tolyq emes otbasylar jáne múmkindigi shekteýli balasy bar otbasylar ǵana qatysa alady. Túrkistan oblysynda kezekke tirkelgen azamattardyń úlesine 400-den astam páter bólingen.

Turǵyndar «Baqytty otbasy» baǵdarlamasy aıasynda «Turǵyn úı qurylys jınaq bankimen» kelisimshartqa otyrýlary tıis. Bank 10 mıllıon teńgege deıin nesıe beredi. Nesıeniń jyldyq mólsherlemesi - 2%, bastapqy jarna -10%, nesıe 20 jylǵa deıin beriledi.

www.hcsbk.kz saıty arqyly ne kez kelgen uıaly telefonnan 300 (Qazaqstan boıynsha tegin) nómirine habarlasyp keńes alýǵa bolady.