Túrkistan oblysynda BAQ salasynyń úzdikteri marapattaldy
TÚRKІSTAN OBLYSY. QazAqparat - Túrkistan oblysynda 28 maýsym - Aqparat jáne baılanys qyzmetkerleriniń kásibı merekesi atalyp ótti. Tólebı aýdanynda uıymdastyrylǵan saltanatty sharada alǵashqy bolyp sóz alǵan óńir basshysy Janseıit Túımebaev BAQ salasy qyzmetkerlerin aıtýly merekemen quttyqtady, dep habarlaıdy QazAqparat tilshisi.
Oblys basshysy BAQ salasynda eńbegi sińgen ardagerlerdi «Oblysqa sińirgen Eńbegi úshin» medalimen, sala úzdikterin oblys ákiminiń Gramotasymen jáne Alǵys hattarymen marapattady.
«Dástúrge aınalǵan aqparat salasy qyzmetkerleriniń kásibı merekesi qoǵamda úlken mártebege ıe. Buqaralyq aqparat quraldary - halyq pen bıliktiń arasyndaǵy altyn kópir. Sizder Prezıdentimizdiń jasampaz ıdeıalarynyń tóńiregine qoǵamdy toptastyrý, ultty uıystyrýǵa zor úles qosyp kelesizder. Demek, qandaı da bir aqparat kóziniń sózi - qoǵamdyq pikir qalyptastyrýdyń temirqazyǵy ispetti. Sondyqtan da árbir sózdi, oqıǵany taratýda shynaıylyq pen adaldyq qaǵıdalaryn saqtaý barynsha mańyzdy dep bilemin. Eseli eńbekterińiz aqtalyp, aldaǵy maqsattarǵa jetý jolyndaǵy jańa bıikter men shyńdardan kórine berińizder!», - dedi Janseıit Qanseıituly.
Budan ózge, merekelik sharada saladaǵy úzdik ujymdar men jýrnalıster anyqtaldy. Bıyl oblystaǵy dástúrli «Úzdik telearna» nomınatsııasyn - «Ontustik» jáne «Aıǵaq» telearnalary jeńip aldy. Al «Eń úzdik aımaq tilshisi» atalymy - «QazAqparat» aqparattyq agenttiginiń tilshisi Aınur Aqbaeva men «Jas Alash» gazetiniń menshikti tilshisi Baqytjan Dáýitovqa buıyrdy. Dástúrli «Úzdik basylym» nomınatsııasyn - «Reıtıng» gazeti ıelendi. Sondaı-aq, telejýrnalıstıka salasyndaǵy «Altyn mıkrofon» nomınatsııasy - Ardaq Jaqsylyqova laıyq dep tanyldy. Merzimdi basylym jýrnalısterine arnalǵan «Altyn qaýyrsyn» syılyǵy Aıdar Quljanovqa buıyrdy. Al «Úzdik aýdandyq, qalalyq basylym» nomınatsııasynda Túlkibas aýdandyq «Shamshyraq» gazeti jeńimpaz atandy. 
Sonymen qatar, saltanatty keshte BAQ qyzmetkerleri Oblys máslıhatynyń, «Nur Otan» partııasy OQO fılıalynyń Gramotalyrymen jáne QR Memlekettik qyzmet isteri jáne sybaılas jemqorlyqqa qarsy is-qımyl Agenttiginiń Túrkistan oblysy boıynsha departamentiniń Alǵys hattarymen, QR Jýrnalıster Odaǵy oblystyq fılıalynyń arnaıy syılyqtarymen marapattaldy. Budan ózge, «Ońtústik ónimi» baıqaýynyń jeńimpazdary anyqtalyp, júldeler tapsyryldy. Kesh sońy kontserttik baǵdarlamaǵa ulasty.
