Túrkistan oblysynda azyq-túlik baǵasyn turaqtandyrýǵa 1,5 mlrd teńge jumsalmaq
Bul týraly brıfıngte turaqtandyrý qory departamentiniń dırektory Laýra Janasbaeva málimdedi.
Qarjy turaqtandyrý qoryna azyq-túlik qoryn satyp alýǵa jáne iri saýda oryndaryn «Aınalym shemasy» jobasymen qarjylandyrýǵa baǵyttalatyn bolady. Búgingi tańda, turaqtandyrý qorynda quny 320,9 mln teńgeni quraıtyn 3 myń tonnaǵa jýyq taýar bar.
Laýra Janasbaevanyń aıtýynsha, oblystaǵy ózge de aýdandardaǵy saýda oryndaryna turaqtandyrý qoryndaǵy arzandatylǵan taýarlar jetkizilýde. Ol taýarlardyń kelýi aýdan ákimdiginiń suranysy boıynsha júzege asady.
Qazirgi kezde «Túrkistan qalasy aýmaǵynda 13 áleýmettik dúken men 5 saýda úılerinde 18 azyq-túlik taýarlary arzandatylǵan baǵamen satylýda. Máselen, kartop pen sábiz - 100 teńgeden, pııaz - 70 teńge, tuz - 42 teńge, kúrish - 265 teńge, makaron - 200 teńge, qant – 315 teńge, un - 150 teńge, kúnbaǵys maıy - 720 teńge, qaraqumyq - 480 teńge, jumyrtqa - 34 teńge, taýyq eti - 870 teńge, qyryqqabat – 110 teńge, áleýmettik nan - 70 teńgeden saýdanalanýda. Budan basqa, Túrkistan qalasynda fılıaly bar «Magným» saýda jelisimen ÁMAT-qa saýda ústemesin 15%-dan 10%-ǵa deıin tómendetý týraly kelisim jasaldy», - dedi Turaqtandyrý qory departamentiniń dırektory.
Sondaı-aq, brıfıngke qatysqan oblystyq kásipkerlik jáne saýda basqarmasynyń basshysy Nurbaqyt Imanqulov ÁMAT baǵalary kúndelik qatań baqylaýda ekendigin aıtyp, bul maqsatta tıisti jumystar atqarylyp jatqandyǵyn jetkizdi.
Taýar baǵalaryn turaqtandyrý boıynsha oblystyq aýyl sharýashylyǵy basqarmasynyń bólim meńgerýshisi Baqdáýlet Tileýov bıyldyń ózinde oblys ortalyǵyndaǵy «Ekobazarda» azyq-túlik taýarlarynyń 9 jármeńkesi ótkenin aıtty. Aıta keterligi, ár juma kúni Túrkistan qalasyndaǵy «Ekobazarda» azyq-túlik taýarlary jármeńkesinde taýarlar naryqtyq baǵadan arzandatylyp satylýda.
