Túrkistan oblysynda azyq-túlik baǵasyn turaqtandyrý qorynyń jumysy jandanady
TÚRKІSTAN. QazAqparat – Túrkistan oblysynda turaqtandyrý qory jumysynyń tıimdiligin arttyrý úshin áleýmettik mańyzy bar azyq-túlik taýarlarynyń baǵasyn ósirmeýge baǵyttalǵan jańa mehanızm ázirlendi. Osyǵan baılanysty óńirde azyq-túlik taýarlarynyń turaqtandyrý qoryn basqarý jónindegi komıssııanyń selektorlyq keńesi ótti, dep habarlaıdy QazAqparat tilshisi.
Oblystyq máslıhat depýtattary men qoǵamdyq uıymdardyń ókilderi qatysqan keńeste Statıstıka departamentiniń, Aýyl sharýashylyǵy basqarmasynyń jáne «Túrkistan» ÁKK» AQ bazasyndaǵy turaqtandyrý qorynyń baıandamalary tyńdaldy. Turaqtandyrý qory basshylyǵynyń aqparaty boıynsha, búgingi tańda 10 428 tonna qosalqy ónim bar. Onyń ishinde: kartop – 4 253 tonna, un - 3 718 tonna, sábiz – 1 094 tonna, pııaz – 1 000 tonna, qyryqqabat – 11 tonna, qumsheker-341 tonna, qaraqumyq jarmasy – 9 tonna. Sondaı-aq, qorǵa tıesili 250 mln teńgeden astam qarajat bar. Ol oblystyq turaqtandyrý qory tarapynan azyq-túlik taýarlarynyń júıeli ınterventsııasy nysanynda ÁMAT baǵasyn turaqtandyrý úshin paıdalanylatyn bolady.
Sonymen qatar, Túrkistan oblysy ákiminiń orynbasary Meıirjan Myrzalıev turaqtandyrý qorynyń negizgi azyq-túlik ónimderine baǵanyń ósýine jol bermeý jónindegi jumysy tıisti túrde júrgizilmegenin jáne qordyń osy baǵyttaǵy derbes jaýapkershiligine nazar aýdarǵanyn atap ótti. Onyń aıtýynsha, Úkimet deńgeıinde baǵany ustap turýdyń birqatar jańa quraldary ázirlendi. Atap aıtqanda, saýda ústemeleri 15% deńgeıinde, saýda núktelerinde otandyq taýarlarǵa keminde 30% keńistik usyný talaby.
Sonymen qatar, komıssııa «Túrkistan»ÁKK» AQ-ǵa 2019 jylǵy 17 tamyzda kúshine engen baǵany turaqtandyrý tetikterin iske asyrýdyń tıptik erejeleri sheńberinde saýda jelilerine qarjy berý arqyly azyq-túlik ónimderiniń baǵasyn ustap turý boıynsha quraldy belsendi iske qosýdy usyndy. Al, «Túrkistan» ÁKK» AQ Investorlarmen kóterme-taratý ortalyǵyn salý boıynsha birlesken jobany ázirleý tapsyryldy.
Aıta keterligi, Túrkistan oblysynda turaqtandyrý qoryna tıesili áleýmettik 14 dúken jumys isteıdi. Onyń 7-i bólshek saýda núkteleri retinde pishindelgen jáne 7-i kóterme bólshek saýda rólin atqarady. Osy saýda núktelerindegi baǵalar Túrkistan qalasy boıynsha ortasha naryqtyq baǵadan 20-25 paıyzǵa tómen.
