Túrkistan oblysynda azyq-túlik baǵasy baqylaýda
NUR-SULTAN. QazAqparat - Túrkistan qalasynda oblystyq kásipkerlik jáne saýda basqarmasynyń uıytqy bolýymen arnaıy jıyn bolyp ótti. Onda Túrkistan oblysynda áleýmettik mańyzy bar azyq-túlik taýarlaryna baǵalardy turaqtandyrý jáne baǵanyń negizsiz ósýiniń aldyn alý máselesi talqylandy, dep habarlaıdy óńirlik ákimdiktiń baspasóz qyzmeti.
Kezdesýge básekelestikti qorǵaý jáne damytý departamenti, oblystyq statıstıka departamenti men aýyl sharýashylyǵy basqarmasy, oblystyq turaqtandyrý qory basshylary, sondaı-aq Túrkistan qalasyndaǵy iri saýda marketteri men kóterme saýda bazarlarynyń basshylary qatysty. Basqosýda áleýmettik mańyzy bar azyq-túlik taýarlarynyń baǵalaryna monıtorıng barysy men baǵa ósimin aldyn alýǵa qarsy baǵyttalǵan sharalardy iske asyrý jumystary talqylandy.
Oblys ákimdigimen qabyldanǵan Qaǵıda talaptary men kásipkerler úshin jasalǵan jaǵdaılardyń tıimdi jaqtary jan-jaqty túsindirildi. Oblys turǵyndary úshin mańyzdysy, saýda oryndary basshylarymen ózara túsinistik jaǵdaıynda birlesken sharalardy atqarý jóninde naqty sheshim qabyldandy. Demek, aldaǵy ýaqytta barlyq áleýmettik mańyzy bar azyq-túlik taýarlarynyń baǵasy tolyq oblystyq ákimdiktiń baqylaýynda bolady.
Aıta keterligi, Túrkistan oblysy ákimdiginiń 2019 jylǵy 4 qarashadaǵy «Áleýmettik mańyzy bar azyq-túlik taýarlaryna baǵalardy turaqtandyrý tetikterin iske asyrýdyń Qaǵıdalaryn bekitý týraly» №256 qaýlysy bekitilgen bolatyn.
