Túrkistan oblysynda azamattyq sektordy damytý máseleleri talqylandy
Shara barysynda zańdy tulǵalardyń qaýymdastyq nysanyndaǵy qoǵamdyq birlestigi «Nur Otan» partııasynyń oblystyq fılıalymen, Túrkistan oblysy ákimi apparatynyń ádep jónindegi ýákilimen, oblystyq Qazaqstan halqy Assambleıasy jáne ishki saıasat basqarmasymen ózara birlesken jumys týraly memorandýmǵa qol qoıdy.
Túrkistan oblysy Óńirlik kommýnıkatsııalar qyzmetinen málim etkendeı, sonymen qatar úkimettik emes uıymdardyń is júzinde júzege asyrylyp jatqan jobalary talqylandy. Jıynǵa aýdandyq jáne qalalyq 50-ge jýyq ÚEU ókilderi qatysty.
Oblystyq Іshki saıasat basqarmasynyń basshysy Beısen Tájibaev qatysýshylardy qoǵamdaǵy túıitkildi máselelerdi sheshýde belsendi bolýǵa shaqyrdy.
«Azamattyq qoǵamdy damytýǵa, ÚEU-larǵa qoldaý bildirýge baǵyttalǵan oń saıasattyń nátıjesinde biz QR Tuńǵysh Prezıdentiniń halyqqa Joldaýy, «Rýhanı jańǵyrý», «Bes áleýmettik bastama» sekildi memlekettik baǵdarlamalardy iske asyrýymyz qajet. Onyń ishinde din, balalar quqyǵy, otbasy jáne jastar saıasaty, múmkindigi shekteýli azamattar máselesi bar. Bul rette, oblystyń pozıtıvti bedelin qalyptastyrýdy júıeli iske asyrý qajet», - dedi ol.
«Túrkistan oblysy Azamattyq Alıansy» zańdy tulǵalardyń qaýymdastyq nysanyndaǵy qoǵamdyq birlestiginiń tóraǵasy Sháripbek Jamalbek aýdan, qalalardaǵy qoǵamdyq birlestikterdiń qaıta tirkeýden ótý jumystarynda tııanaqtylyq tanytýǵa shaqyrdy.
«Oblys boıynsha qaıta tirkeýden ótken uıymdardyń sany júzden endi asty. Sondyqtan da tirkelýdi keshiktirmeı, ótkizgenderińiz durys. Al ózekti máseleler týyndaǵan jaǵdaıda árbir qoǵamdyq uıym jeke múddesi úshin emes, memleket múddesi úshin birlese jumys atqarýy tıis. Azamattyq sektordy damytý jaıy - bılik pen uıymdardyń ortaq maqsaty. Bul salada bárimizdiń birlese atqaratyn jobalarymyz kóp. Sol kezde ǵana biz qundylyqtardy saqtaǵan, bereke-birlikte ómir súretin egemen eldiń bir bólshegi bolamyz», - dedi ol.
Sondaı-aq memlekettik organdarmen birlese jumys isteýge ýaǵdalasqan aýdan, qalalardaǵy úkimettik emes uıymdardyń jetekshileri ózderiniń tıimdi jumys júrgizý ádisi men jańa jobalary týraly oı qozǵady.
