Túrkistan oblysynda aıyp turaǵynda 8 avtokólik janyp ketti
TÚRKІSTAN. QazAqparat – Túrkistan oblysy, Saıram aýdanynda aıyp turaǵyndaǵy 8 avtokólik janyp ketti.
Kólikterdi Qarasý aýyldyq okrýginde turatyn jergilikti turǵyn órtegeni anyqtaldy, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, órtke qarsy qyzmet pýltine shaqyrtý saǵat 05:55-te kelip túsken. 8 mınýttan keıin órt sóndirýshiler tilsiz jaýdy aýyzdyqtap, saǵat 06:38-de órt tolyqtaı sóndirilgen. Tártip saqshylary avtoturaqta barlyǵy 39 kólik bolǵanyn anyqtady. Tekserý barysynda kólikterdi órtegen kúdikti beınebaqylaý kamerasynyń obektıvine túsip qalǵany jáne onyń Mankent aýylynda turatyny anyqtaldy. Sondaı-aq, onyń kóligi buǵan deıin aıyp turaǵyna qoıylǵan bolyp shyqty.
«Avtokóligin qujatsyz ári mas halde basqarǵany úshin tártip buzýshyny polıtsııa qyzmetkerleri ustap, ákimshilik jaýapqa tartqan. Onyń avtokóligi aıyp turaǵyna qoıylǵan bolatyn. Al, kúdikti bolsa, túngi ýaqytta qorshaýdan ótip, óz avtokóligine kelip, ony órtegen. Sóıtip oqıǵa ornynan boı tasalaǵan. Jedel-izdestirý jumystary barysynda er adam ustalyp, aýdandyq polıtsııa bóliminiń ýaqytsha ustaý ızolıatoryna qamaldy. Ol óz kinásin tolyq moıyndap, sotqa deıingi tergeý amaldary júrgizilýde. Kúdiktige qatysty 7 jylǵa deıingi merzimge bas bostandyǵynan aıyrýdy kózdeıtin QR QK-niń 202-babynyń 2-bóligi (bóten adamnyń múlkin qasaqana joıý nemese búldirý) boıynsha is qozǵalǵan» delingen habarlamada.
