Túrkistan oblysynda aýyz sýmen qamtylǵan eldi mekender sany artyp keledi
Jıynda oblys ákimi Ómirzaq Shókeev keshendi jospar oblystyń damýyna serpin bergenin aıta kele bul baǵyttaǵy jumysty jandandyrýdy tapsyrdy. Oblystyq strategııa jáne ekonomıkalyq damý basqarmasynyń basshysy Qanat Qaıypbektiń aıtýynsha, óńirdiń áleýetin odan ári damytý maqsatynda 2021-2025 jyldarǵa arnalǵan keshendi jospar sátti júzege asyrylýda. Máselen ótken jyly keshendi josparda 93 is-sharany bastaý kózdelip, tıisti jumystar atqarylǵan. Nátıjesinde 10 is-shara oryndalsa, 73 is-shara boıynsha jumystar jalǵasyp jatyr. Al, bıyl keshendi jospar arqyly 99 is-sharany júzege asyrý josparlanyp otyr. Jalpy keshendi jospar óńirdiń ekonomıkalyq áleýetin kóterýge jáne jeke ınvestıtsııalardyń kelýine oń serpin bergen. Túrkistan qalasynyń ınfraqurylymy tolyq qalanyp, shahar zaman talabyna saı túrlene túsýde. Óńir basshysy keshendi jospardyń árbir tarmaǵyn sapaly ári ýaqtyly oryndaýdy tapsyrdy.
Májiliste sondaı- aq, eldi mekenderdi aýyz sýmen qamtý máselesi de talqylandy. Ótken jyly aýyz sýmen jabdyqtaý salasy boıynsha óńirde 58 nysannyń qurylysyna bıýdjetten qarajat bólingen. Osy arqyly 25 nysan paıdalanýǵa berilse, qalǵan 33 nysannyń qurylysy aǵymdaǵy jylǵa aıaqtalady. Nátıjesinde 20 eldi meken aýyz sýmen qamtamasyz etilse, 8 aýyldyń tozyǵy jetken qubyrlary qaıta jańartylǵan. Qazir oblystaǵy 841 eldi mekenniń 717-sine taza aýyz sý jetkizildi. Al, aýyz sýmen jabdyqtaý salasy boıynsha 38 nysannyń qurylysyna bıýdjetten qarjy bólinip otyr. 28 nysan bıyl paıdalanýǵa berilse, qalǵan 10 nysannyń qurylysy 2023 jylǵa ótpeli. Jospar boıynsha jyl qorytyndysymen 24 eldi meken aýyz sýmen qamtamasyz etilse, 14-inde tozyǵy jetken sý qubyrlary qaıta jańartylmaq. Osy jumystar nátıjesinde aýyz sýmen qamtylǵan eldi mekender sany 741-ge jetedi.
Ómirzaq Shókeev jaýapty basqarma basshysy men aýdan, qala ákimderine aýyz sýmen qamtý baǵytyndaǵy jumysty kúsheıtýdi tapsyrdy. Óz isine jaýapty merdigerlermen ǵana kelisimshart jasap, sońyna deıin jetkizýdi mindettedi