Túrkistan oblysynda aýyldastarynyń gaz esepteýishin urlaǵan zeınetker ustaldy
TÚRKІSTAN. QazAqparat - Túrkistan oblysynda aýyldastarynyń gaz esepteýishin urlaǵan zeınetker ustaldy, dep habarlaıdy QazAqparat oblystyq Polıtsııa departamentinine silteme jasap.
«Báıdibek aýdandyq PB-na jergilikti turǵyn aryzdanǵan. Ol úıiniń syrtynda temir qalqanshada turǵan gaz eseptegish quraly men gaz qysymyn ólshegish quralyn urlap ketkenin aıtyp shaǵymdanǵan.
Aýdandyq polıtsııa bóliminde 10 kún ishinde osyndaı taǵy 4 derek tirkelgen. Jábirlenýshiler 200 myń teńgege jýyq shyǵyn kelgen. Atalǵan ister biriktirilip, QR QK-niń 188-baby boıynsha sotqa deıingi tergep-tekserýdiń biryńǵaı tizilimine tirkeldi», delingen habarlamada.
Urlyqty ashý úshin aýdandyq polıtseıler jaqyn mańdardy tekserip, kýágerlerden jaýap aldy. Nátıjesinde, naqty aqparat boıynsha zeınetker kúdikke ilindi.
Keıin osy urlyqqa qatysy bar, jergilikti turǵyn Shaıan aýylynyń kósheleriniń birinen ustaldy. Kúdiktiniń sómkesin tintý barysynda 2 gaz eseptegish quraly men 2 qubyr buramasyn sheshetin arnaıy kilt tabyldy. Sondaı-aq, kúdiktiniń jaýabyna sáıkes úıinen urlanǵan zattar tabylyp, zańdy ıelerine qaıtaryldy. Ustalǵan qarııa óz kinásin tolyq moıyndady, oǵan eshqaıda ketpeý týraly qolhat arqyly bultartpaý sharasyn qoldanyldy.
Tergeý barysynda, kúdikti zeınet jasyna shyqqannan soń, aýylda otyn butaýmen aınalysqany anyqtaldy. Al, jábirlenýshiler oǵan aǵashtaryn jarǵyzyp, aralatqan bolyp shyqty.
Qazir tergeý amaldary júrgizilip, is aıyptaý aktisimen sotqa joldanǵan.
