Túrkistan oblysynda aýyl turǵyndary tegin medıtsınalyq tekserýden ótti
ORDABASY. QazAqparat – Túrkistan oblystyq salaýatty ómir saltyn qalyptastyrý ortalyǵynyń uıymdastyrýymen Ordabasy aýdanynyń Qaraspan aýylynda «Densaýlyq joly-2019» aktsııasy ótti. Oblys ortalyǵynan shalǵaı jatqan eldi meken turǵyndaryna tolyqtaı medıtsınalyq tekserýden ótýine múmkindik jasaý maqsatynda uıymdastyrylǵan sharada turǵyndar beıindi mamandardyń keńesin alyp, medıtsınalyq aqparattylyǵy men óz densaýlyqtaryna jaýapkershilikterin joǵarylatý jóninde keńester tyńdady, dep habarlaıdy QazAqparat tilshisi.
Shara barysynda medıtsına qyzmetkerleri turǵyndardy salaýatty ómir saltyn ustanýǵa shaqyrdy. Deneniń artyq salmaǵynyń densaýlyqqa zııandylyǵy túsindirilip, durys tamaqtaný boıynsha túrli keńester berildi. Fızıkalyq belsendilik, juqpaly emes aýrýlardyń aldyn alý, densaýlyqty kútý men nyǵaıtý jaıy da keń kólemde túsindirildi. Qaraspan aýyldyq dárigerlik ambýlatorııasynda terapevt, kardıolog, pedıatr, endokrınolog, onkolog, oftalmolog dárigerler turǵyndardy profılaktıkalyq tekserýden ótkizip, keńester berdi.Tegin dárigerlik tekserý barysynda birshama turǵynǵa dárigerge qaralýǵa joldama berildi. Aktsııaǵa qatysýshylardyń barlyq suraqtaryna jaýap bergen mamandar nusqamalar jáne habarlamalyq-bilimdik materıaldaryn taratty.
Sondaı-aq, barlyq halyqty belsendi bolýǵa, medıtsına qyzmetkerleriniń nusqamalaryn oryndaýǵa, óz densaýlyqtaryn saqtaýǵa jáne kúsheıtýge shaqyrdy.
