Túrkistan oblysynda aýyl turǵyndary aýdan ákimine máselelerin jetkizdi
TÚRKІSTAN. QazAqparat – Túrkistan oblysy, Ordabasy aýdanynyń ákimi Álipbek Óserbaev bir top turǵyndy jeke máseleleri boıynsha qabyldady.
Aýyl turǵyndary ákimnen aýyz sý men jer telimderine qatysty problemalaryn kóterdi, dep habarlaıdy QazAqparat tilshisi.
Aýdan ákimine kelgen turǵyndardyń biri Erbolat Estaev jer máselesin jetkizse, Temirlan aýylynyń turǵyny Abaı Atambaev aýyz sýdyń nasharlyǵy jóninde aıtty. Taǵy bir azamat kásipkerlikti damytý maqsatynda Batys-Qytaı, Batys-Eýropa kúre jolynyń boıynan jer telimin alýǵa kómek surady. Qabyldaýda bolǵan ózge turǵyndar turǵyn úı men Arystandy aýylyndaǵy týyndaǵan máseleni kóterdi. Kommýnaldyq turǵyn úılerdiń qujattaryn durystaýǵa kómek surap, bir turǵyn áıeline memlekettik grantpen 505 myń teńge alýǵa ótinish jasady.
Ábdihalyq Ábdiraıymuly atty turǵyn aıtyskerler úıirmesi ashylsa jáne Maılyqoja aqynnyń 185 jyldyǵy toılansa degen usynysyn aıtsa, Badam aýyly okrýginiń turǵyndary «Bolashaq» mektebindegi daý-damaıdyń túıinin sheshýdi ótindi. Jergilikti halyqtyń aryz-shaǵymdary men usynys-tilekterin tyńdaǵan aýdan basshysy Álipbek Sháripbekuly zańǵa sáıkes sheshilý joldaryn túsindirdi. Aýyl okrýgi ákimderi men tıisti bólim basshylaryna tapsyrmalar júktedi.
