Túrkistan oblysynda aýyl turǵyndary asarlatyp 6 balalar oıyn alańshasyn salyp jatyr
Kentaý qalasyna qarasty Qarnaq aýylynyń turǵyndary asarlatyp balalar oıyn alańshalaryn salyp jatyr. Igi iske uıytqy bolǵan jannyń biri qalalyq maslıhat depýtatty Bekzat Habıbov.
Asar jolymen júzege asyp jatqan joba barysynda basketbol, voleıbolǵa arnalǵan zamanaýı kishi sport alańshalary salynyp, aınalasy jaryqtandyrylady. Sonymen qatar, kishi sýburqaqtar qoıylyp, kópshilik demalatyn oryndyqtar ornatylmaq.
«Mundaǵy basty maqsat - aýyl balalarynyń bos ýaqytyn tıimdi paıdalanýǵa úıretý, salaýatty ómir saltyn ustanýǵa dáripteý. Elimizdiń keleshegi salaýatty jastardyń qolynda. Sondyqtan da biz kóp jaǵdaıda olardyń talap-tilegimen sanasýymyz qajet», - deıdi Bekzat Habıbov.
Balalarǵa arnalǵan oıyn alańshalary aýyldyń ortalyq kóshelerinen boı kótergen. Kásipkerler qarjy jınap qajetti materıaldardy satyp alsa, aýyldyń jigitteri ár senbi, jeksenbi kúnderi tegin jumys istep jatyr. As-sýdy da jergilikti turǵyndar daıyndap berýde. Endi aldaǵy ýaqytta qarnaqtyqtar aýyldan saıabaq pen sport alańshalaryn asar jolymen salýdy josparlap otyr.
«Qandaıda bir is bolsyn, aýylymyzdyń azamattary jumyla judyryq bolyp, bir kisideı atsalysyp ketedi. Uıymshyldyq tanytyp júrgen jandardyń barlyǵyna jerlesterimniń atynan alǵys aıtamyn», - deıdi Bekzat Habıbov.
Jalpy yntymaǵy men birligi jarasqan aýyl jastarynyń ıgi isteri búginde kópshilikke úlgi bolyp otyr. Qarnaqtyqtar ótken jyly asarlatý ádisimen úsh myń adamǵa arnalǵan meshit turǵyzǵan bolatyn. Ǵıbadat úıiniń qurylysyna Shymkent, Astana, Almaty, Tashkent, Máskeý qalalarynda turyp jatqan aýyl azamattary da úlesterin qosqan.
Al, kóktem mezgilinde eki turǵynnyń úıin tasqyn sý shaıyp ketti. Sodan jergilikti turǵyndar ortadan qarjy jınap, úısiz qalǵan bir otbasyna baspana salyp berdi. Al, ekinshi úıdiń qurylys jumystaryn jaqyn arada bastamaq.
Qoqys shyǵarý isinde qarnaqtyqtar asar jolymen sheshken. Arnaıy qor ashyp, qarjy jınap, qoqys konteınerlerin satyp alǵan. Sodan aýyl ishine qoıyp shyqqan. Qazir arnaıy kólik belgilengen ýaqytyna sáıkes, qoqysty jınap alyp ketedi.
