Túrkistan oblysynda aýyl sharýashylyǵy salasyna ozyq tehnologııalar engizilýde
TÚRKІSTAN. QazAqparat - Túrkistan oblysynyń ákimi Ómirzaq Shókeev Keles aýdanynda bolyp, onda birqatar nysandardy aralap kórdi. Jańadan qurylǵan aýdanda atqarylyp jatqan jumystarmen tanysty, dep habarlaıdy QazAqparat tilshisi.
Aımaq basshysy eń aldymen Birtilek aýyldyq okrýgindegi Eńbekshi eldi mekeninde «Keles plast» JShS-niń tsehyna bardy. Jobalyq quny 150 mln teńge bolatyn kásiporyn 2018 jyly iske qosylǵan. Búginde jylyjaıǵa arnalǵan zattardy shyǵarýmen aınalysady. Sondaı-aq óńir basshysy Besqubyr eldi mekenindegi «Óktemhan» sharýa qojalyǵynda da boldy. Jylyna 120 tonna kókónis ónimin beretin jylyjaı 0,65 ga aýmaqta ornalasqan. Jalpy 15 adamdy jumyspen qamtyp otyrǵan sharýashylyqtyń jobalyq quny 22 mln teńgeni quraıdy. 
Sondaı-aq óńir basshysy Júzimdik jáne Birlesý aýyldyq okrýgterindegi 8 eldi mekendi tabıǵı gazben qamtamasyz etý barysymen tanysty. Odan keıin Birlesý aýyldyq okrýgi, Qazaqstan eldi mekenindegi sharýashylyqqa bardy. Munda jylyna 3 ret kókónis óndirý jobasy qarastyrylyp jatyr.
Dálirek aıtsaq, M.Áýezov atyndaǵy OQMÝ-niń ǵylymı qyzmetkeri B.Qalymbetovtyń QR Bilim jáne ǵylym mınıstrliginiń 147 mln teńge grantyn jeńip alǵan ozyq tehnologııasy endirilýde. Aýdandaǵy birqatar nysandardyń jaı-kúıimen tanysqan oblys ákimi ónim óndirýde jańa tehnologııalardy tıimdi paıdalaný zaman talaby ekenin aıtyp, birqatar tapsyrmalar júktedi.
Odan bólek oblys basshysy Birlik aýyldyq okrýgi aýmaǵyndaǵy «TM-Stroı - 21» JShS-niń press jip ıirý jáne qysh zaýyttaryna bardy. Keles aýdanyna jasaǵan issapary barysynda Túrkistan oblysynyń ákimi Ómirzaq Shókeev Birlik aýyldyq okrýginiń aýmaǵynda salynyp jatqan «Qyzyl ásker» qosalqy elektr stansasynyń qurylysymen tanysyp, Keles ózenindegi «Oımaýyt» sý bógetin aralap kórdi. 
