Túrkistan oblysynda aýyl sharýashylyǵy óniminiń jalpy kólemi 450 mlrd teńgeni qurady
TÚRKІSTAN. QazAqparat - Bıylǵy jyldyń 9 aıynda aýyl sharýashylyǵy óniminiń jalpy kólemi 450 mlrd teńgeni qurap, byltyrǵy jylmen salystyrǵanda edáýir artty, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Negizgi kapıtalǵa salynǵan ınvestıtsııa kólemi de 2,5 esege kóbeıip, Túrkistan oblysynyń respýblıkadaǵy úlesi 3-shi orynda tur. Búginde Túrkistan óńirinde 70 myńnan astam sharýa qojalyqtary jumys isteıdi. Oblysta egistik alqaptary ulǵaıtylyp, egisti ártaraptandyrý maqsatynda mal azyqtyq daqyldarǵa kóńil bólinip otyr. Ozyq tehnologııalardy engizý jáne aýyl sharýashylyǵy tehnıkalaryn jetildirý baǵytynda da kóptegen jumystar atqarylǵan. Máselen, tamshylatyp sýǵarý ádisi qosymsha 7,0 myń ga endirilip, jalpy kólemi 16,8 myń ga jetti. Jańadan 400 den astam shaǵyn bordaqylaý alańdary, 12 qus fermasy men balyq sharýashylyqtary ashylǵan. Bıyl aýyl sharýashylyǵy salasynda aldyńǵy qatarly tehnologııalardy qoldana otyryp, halyqty jumyspen qamtý maqsatynda jalpy quny 103,3 mlrd. teńgeni quraıtyn 553 joba ázirlendi. Nátıjesinde 4620 jańa jumys oryndary ashylatyn bolady. Búgingi kúnge olardyń teń jartysynan astamy iske asqan jáne kóbine mal sharýashylyǵyn damytý salasyna baǵyttalǵan.
2019 jyldyń 9 aıynyń qorytyndysymen aýyl sharýashylyǵy ónimderiniń eksporty 157,3 mln. AQSh dollaryn quraǵan. Reseı, Ózbekstan, Tájikstan, Ázerbaıjan, Iran, jáne Bahreın elderine iri qara jáne ýaq mal etteri eksporttalǵan. Sonymen qatar, Reseı men Belarýsqa 304,3 myń tonna qarbyz ben qaýyn jetkizilgen. Sondaı-aq, maqta talshyǵynyń eksporty jyl saıyn artýda. Bıyl 264,0 mln AQSh dollaryn quraıtyn aýyl sharýashylyǵy ónimderin eksporttaý kútilýde.
