Túrkistan oblysynda aýyl sharýashylyǵy ónimderiniń eksporty 180,9 mln dollarǵa jetti
TÚRKІSTAN. QazAqparat - Túrkistan oblysynda aýyl sharýashylyǵynyń jalpy ónim kólemi 542,8 mlrd teńgeni qurady.
Óńir osy kórsetkish boıynsha qazir respýblıka kóleminde 2-shi orynda tur. Bul týraly oblystyq aýyl sharýashylyǵy basqarmasynyń basshysy Nurbek Badyraqov óńirlik kommýnıkatsııalar qyzmetinde ótken baspasóz máslıhatynda málimdedi, dep habarlaıdy QazAqparat tilshisi.
2018 jyly aýyl sharýashylyǵy salasynda atqarylǵan jumystarǵa esep bergen Nurbek Badyraqov Túrkistan oblysynyń aýyl sharýashylyǵy salasy boıynsha óndirgen jalpy ónim kólemi respýblıkalyq kórsetkishtiń 12,4 paıyzyn qurap, 2 orynda turǵandyǵyn atap ótti. Al, aýyl sharýashylyǵy eksportynyń kólemi 180,9 mln AQSh dollaryna jetip, ótken jylmen salystyrǵanda 20,2 mln dollarǵa artqan. Atalǵan salanyń negizgi kapıtalyna tartylǵan ınvestıtsııalar kólemi 43,8 mlrd teńge bolyp otyr. ıA,nı óńir tartylǵan ınvestıtsııa kólemi jóninen elimiz boıynsha tórtinshi orynda tur.
Basqarma basshysy óńirdiń sońǵy eki jylda jergilikti bıýdjetten 2,6 mlrd teńge qarjy bólinip, 52 nysanǵa jóndeý jumystary júrgizilgenin málimdedi. Nátıjesinde, 45,5 myń gektar jerdiń aǵyn sýmen qamtamasyz etilýi jáne melıoratıvtik jaǵdaıy jaqsaryp, 1 myń gektar jer jańadan aınalymǵa engen.
«Halyqaralyq qaıta qurý jáne damý bankiniń qarjylandyrýymen «Irrıgatsııa jáne drenaj júıelerin jetildirý» jobasynyń úshinshi kezeńinde 57,3 myń gektar jerdi qalpyna keltirý josparlanǵan. Respýblıkalyq menshikke ótkizilýi tıis 57,3 myń gektar sýarmaly jerdegi sý nysandarynyń 90% respýblıkalyq menshikke ótkizildi», - dedi Nurbek Badyraqov.
Basqarma basshysynyń sózinshe, óńirde 181,3 gektar aýmaqqa jylyjaı salynǵan. Osylaısha, jylyjaı isin órkendetý jóninen Túrkistan oblysy respýblıkada 77 paıyzdyq úleske jetti. Aǵymdaǵy jyly aımaqta 180 gektar jylyjaı salý josparlanyp otyr.
