Túrkistan oblysynda aýyl aýrýhanalary tsıfrlyq júıege kóship, qaǵazsyz jumys isteýde

TÚRKІSTAN. QazAqparat - Búgin QR Premer-Mınıstriniń orynbasary Berdibek Saparbaev pen QR Densaýlyq saqtaý mınıstri Eljan Birtanov Túrkistan oblysyndaǵy birqatar medıtsınalyq nysandy aralady, dep habarlaıdy QazAqparat.

Úkimet múshelerinen quralǵan delegatsııa aldymen Otyrar aýdanyna bardy.

QR Densaýlyq saqtaý mınıstri Eljan Birtanov aldymen, aýyl aýrýhanasynyń jumysymen tanysty. Jergilikti saýyqtyrý ortalyǵy 50 myńǵa jýyq halyqqa qyzmet kórsetedi. Aýyl aýrýhanasy tolyq tsıfrlyq júıege kóshken. Internet pen medıtsınalyq aqparattyq júıe 100 paıyz qoljetimdi.

Aýyl turǵyny qalalyq nemese oblystyq aýrýhanaǵa tússe, dárigerler JSN boıynsha jeke karta ashady. Al patsıent týraly barlyq derek, zerthanalyq saraptamanyń qorytyndysy elektrondyq densaýlyq pasportynda jedel kórinedi. Aýrýhana zamanaýı apparattarmen jabdyqtalǵan.

«Densaýlyq saqtaý júıesiniń jumysyn ońtaılandyryp, medıtsınalyq qyzmetti qoljetimdi ári sapaly etý úshin medıtsına salasyn tolyq tsıfrlyq júıege kóshirý qajet», - dedi Eljan Birtanov.

Mınıstr medıtsınalyq qyzmetkerlermen kezdeskende mindetti medıtsınalyq saqtandyrýǵa kóp kóńil bóldi jáne 2020 jyldyń 1 qańtarynan bastap dárigerlerdiń eńbekaqysy 30% deıin, medbıkelerdiń jalaqysy 20% deıin artatynyn aıtty.

Otyrar aýdandyq aýrýhanasynda 800-ge jýyq qyzmetker jumys isteıdi. Aýrýhanada naýqastarǵa bar jaǵdaı jasalǵan. Patsıentter úshin Senim telefony ornatyldy, ishki aýdıt te qyzmet etedi. Sondaı-aq, jergilikti dárigerlerdiń shetelge baryp, biliktiligin arttyrýǵa múmkindik bar.