Túrkistan oblysynda «Aýyl amanaty» jobasy arqyly 3000-ǵa jýyq turǵyn nesıe ala alady
Túrkistan oblysy kásipkerler palatasy dırektorynyń aýylsharýashylyq kesheni boıynsha orynbasary Nurbol Rysbekovtyń aıtýynsha, oblysta nesıe alýǵa 2750 adamnyń múmkindigi bar.
«Baǵdarlamany júzege asyrýǵa bıyl respýblıkalyq bıýdjetten 11 mıllıard teńge qarjy bólindi. Qosymsha 14 mıllıard teńge bólý jóninde QR Aýylsharýashylyǵy mınıstrligine ótinim berildi. Nesıe alý úshin aýyl turǵyndary aldymen aýyl ákimdikterine ótinim berýi qajet. Bul jobanyń aýyldyq jerlerde jańa jumys oryndaryn qurýǵa, mal men qustyń sanyn kóbeıtýge, shaǵyn kásipkerlikti ashý arqyly halyqtyń tabysyn arttyrýǵa jáne azyq-túlik qaýipsizdigin qamtamasyz etýge septigi tıedi degen oıdamyn» - dedi Nurbol Rysbekov.
Jobadaǵy shartta kórsetilgendeı, nesıe alýshy kem degende bir jyl sol jergilikti aýyldyń turǵylyqty azamaty bolýy kerek. Oǵan qosa, mindetti túrde kepilge qoıatyn jyljymaıtyn múlki bolýy shart. Eger kepil bolmaǵan jaǵdaıda týystardyń kepilin paıdalana alady.
Aıta keteıik, atalǵan joba 2023-2025 jyldar aralyǵynda júzege asyrylady. Mıkrokredıt merzimi – 5 jyl, mal sharýashylyǵy jobalaryna nesıe 7 jylǵa deıin beriledi. Bir jylǵa deıin demalys qarastyrylǵan.
