Túrkistan oblysynda aýyl ákiminiń orynbasary jas qyzdy buzaqydan qutqaryp qaldy
TÚRKІSTAN. QazAqparat - Túrkistan oblysy polıtsııa departamentiniń basshylyǵy erjúrek azamatty arnaıy qabyldap, marapattady, dep habarlaıdy QazAqparat tilshisi.
Oqıǵa Saryaǵash aýdany Darbaza aýylynda bolǵan. Otbasymen keshki serýenge shyqqan jasóspirim qyz úıine erterek qaıtqan. Sol sátte sońynan ergen kúdikti shashynan tartyp, shetke qaraı súırep alyp shyqqan. Betinen uryp, jerge qulatqan. Kómek surap aıqaılaǵan onyń aýzyn jaýyp, qylqyndyrǵan. Sol tustan áıelimen birge ótip bara jatqan Súıindik Seıitjapparuly qyzdyń daýsyn estip, birden kómekke umtylǵan.
«Júgirip kele jatqanymdy kórgen kúdikti qasha jóneldi. Qyzdan mán-jaıdy surap bilgen soń, birden sońynan qýdym. Keıin qýyp jetip, ustap, ony polıtsııaǵa tapsyrdym. Meniń ornymda basqa bireý bolsa da osylaı kómekteser edi. Bul meniń azamattyq boryshym dep bildim. Eń bastysy qyzdyń jaǵdaıy jaqsy» -deıdi Súıindik Seıitjapparuly.
Búgin Túrkistan oblysy polıtsııa departamenti bastyǵynyń mindetin atqarýshy, polıtsııa polkovnıgi Asyljan Qaldarbekov beıbit kúnniń batyry Súıindik Seıitjapparulyn qabyldady. Arnaıy syılyqpen marapattap, alǵys aıtty.
Al, kúdikti qamaýǵa alyndy. Oǵan qatysty QR QK-niń 120-baby 4-bólimi «Zorlaý» jáne 24-baby 3-bóligi «Qylmysqa daıyndalý jáne oqtalý» boıynsha sotqa deıingi tergeý amaldary júrgizilýde.
