Túrkistan oblysynda aýyl ákimderi mal sanyn qoldan ósirip, ótirik aqparat berip kelgen

TÚRKІSTAN. QazAqparat - Túrkistan oblysynda aýyl ákimderi mal sany boıynsha burmalanǵan aqparat berip, jaıylym jerge degen qajettilikti artyq kórsetken. Mundaı zańbuzýshylyqty oblystyq prokýratýra qyzmetkerleri kezekti tekserý kezinde anyqtady, dep habarlaıdy QazAqparat tilshisi.

Qadaǵalaýshy organ ókilderiniń aıtýynsha, mal basyn jasandy túrde kóbeıtý deregi Arystyń bes aýyldyq okrýginde tirkelgen.

Máselen, Aqdala aýyldyq okrýginde jekeniń qolyndaǵy 1382 mal jaıylymǵa muqtaj bolsa, ákim óz esebinde shalǵaıdaǵy sharýashylyqtyń da tórt túligin qosyp kórsetken.

Sóıtip maldyń sanyn 8817 dep beripti.

Osylaısha tıisti normatıvten artyq jaıylym qajet dep jalǵan aqparat usynǵan.

«Mal esebi durys júrgizilmeýi saldarynan memlekettik statıstıka buzylǵan. Jer qatynastary basqarmasy statıstıkaǵa berilgen jalǵan málimetti tekserýsiz tek normatıvtik qajettilikke kóbeıtýmen shektelip, jaıylym tapshylyǵyn qoldan jasaǵan»,- deıdi oblystyq prokýratýranyń basqarma bastyǵy Nurjan Boranbaev.

Sondaı-aq, aýyl ákimderi men veterınarııa qyzmeti bergen mal sany eki túrli ekeni anyqtalǵan.

Jergilikti jerlerde jaýaptylar jaıylymdardy qaıtarý boıynsha aqparattyq tehnologııalardy qoldanbaıtyn bolyp shyqty.

Ári májbúrlep alyp qoıý men ákimshilik jaýapqa tartý protsedýrasyn da júzege asyrmaı kelgen.

Búgingi kúnge qaıtarylǵan jaıylym kórsetkishteri basym bóligi tek óz erikterimen qaıtarý jáne ákimderdiń arnaıy qordaǵy jerden ortaq jaıylymǵa bekitip berýi esebinen oryndalǵan.