Túrkistan oblysynda aýyl ákimderi áleýmettik jeli arqyly baılanysqa shyǵady
TÚRKІSTAN OBLYSY. QazAqparat – Aldaǵy ýaqytta «Adal kómek» jobasy aıasynda óńirimizdiń 16 qala jáne aýdan ákimderi men 181 aýyldyq okrýg ákimderi áleýmettik jeliler arqyly baılanysqa shyǵady. Bul týraly QazAqparat ákimdiktiń baspasóz qyzmetine silteme jasap habarlaıdy.
Elde engizilgen tótenshe jaǵdaı halyq pen memlekettik organdy áleýmettik oqshaýlaýǵa alyp keldi. Bul óz kezeginde azamattar men memlekettik apparat arasynda kommýnıkatsııalyq kedergilerdiń týyndaýyna sebep boldy.
Osyǵan oraı, QR Sybaılas jemqorlyqqa qarsy is-qımyl agenttiginiń bastamasymen el aýmaǵynda halyqqa quqyqtyq keńes berý maqsatynda «Adal kómek» jobasy iske qosyldy.
Atalmysh joba Túrkistan oblysynyń aýdan ákimderi tarapynan barynsha qoldaý taýyp otyr. Aýdan basshylary óńir turǵyndaryn tolǵantqan máselelerdi sheshý maqsatynda áleýmettik jeliler arqyly «tikeleı efırge» shyǵýda.
Mysaly, búgin Túlkibas jáne Shardara aýdandarynyń ákimderi onlaın rejımde kásipkerlik qyzmetpen aınalysatyn azamattarǵa qandaı qoldaý kórsetiletindigi týraly aıtyp, kóshe boıyndaǵy jasyl jelekterdi kútip ustaý jáne sanıtarlyq tazalyq boıynsha qala turǵyndarynyń saýaldaryna naqty jaýap berip, usynys-pikirlerin tyńdady.
Aıta ketsek, aldaǵy ýaqytta «Adal kómek» jobasy aıasynda óńirimizdiń 16 qala jáne aýdan ákimderi men 181 aýyldyq okrýg ákimderi áleýmettik jeliler arqyly baılanysqa shyǵyp, turǵyndardyń suraqtaryna jaýap beretin bolady.
