Túrkistan oblysynda aýrýhanalarǵa dezınfektsııalyq týnnelder ornatylýda
TÚRKІSTAN. QazAqparat – Túrkistan qalalyq jáne Saıram aýdandyq ortalyq aýrýhanalarynda dezınfektsııalyq týnnelder ornatyla bastady. Olar qabyldaý jáne bosaný bólimsheleriniń kireberisine qoıylýda, dep habarlaıdy QazAqparat tilshisi.
Sala mamandarynyń aıtýynsha, zalalsyzdandyrý suıyqtyǵyn búrkip shashatyn qondyrǵylardyń tıimdiligi mol.
«Aýrýhanalardyń qyzmetkerleri men naýqastar ǵımaratqa kirý úshin sol jerden ótkiziledi. Qurylǵy avtomatty túrde iske qosylyp, arnaıy suıyqtyq shashylady. Osylaısha kıimdegi qaterli vırýstardy joıyp, ınfektsııanyń aldyn alýǵa bolady», - deıdi sala mamandary.
Búginde oblystaǵy medıtsınalyq uıymdarda COVID-19 ınfektsııasymen kúres jumystary barynsha qolǵa alynǵan. Úkimettiń rezervtik qarajaty esebinen barlyq emdeý mekemelerine medıtsınalyq buıymdar, betperdeler, qolǵaptar, dárilik zattar men jeke qorǵanysh quraldary jetkizilgen. Koronavırýs ınfektsııasyn zertteý jáne emdeý týraly klınıkalyq hattamasynyń tizimi negizinde dárilik zattar men medıtsınalyq buıymdar qory bekitilgen. Aıta ketsek, koronavırýsqa shaldyqqan naýqastardy emdeý úshin ınfektsııalyq statsıonarlarda 200 tósek oryn daıyndalǵan. Qaýipti indetke uqsas klınıkasy bar naýqastarǵa arnalǵan 640 tósek oryndyq provızorlyq statsıonar bar. Odan bólek barlyq aýdandar men qalalardaǵy ınfektsııalyq aýrýlar bólimderi daıyndyq jaǵdaıyna keltirilgen. Qarym qatynasta bolǵandardy oqshaýlaý úshin oblys aýmaǵyna 1256 orynǵa karantındik ortalyqtar uıymdastyrylǵan.
