Túrkistan oblysynda ata-anasynyń qaraýynsyz qalǵan 9 bala sýǵa batyp ketken
Túrkistan oblysynda tek bıyldyń ózinde 14 adam sýǵa ketken. Onyń 9-y – ata-analarynyń qaraýynsyz qalǵan jas balalar. Qaıǵyly jaǵdaılardyń basty sebepteri – balalar sýdaǵy qaýipsizdikti saqtamaıdy, ruqsat etilmegen jerlerde shomylady.
Búginde departament tarapynan shomylý maýsymyn qaýipsiz ótkizý maqsatynda aýdan, qala ákimdikterimen jáne quzyrly organdarmen birlesip keshendi is-sharalar uıymdastyrylyp jatyr. Jyl basynan beri departament qyzmetkerleri jergilikti polıtsııamen, kólik ınspektsııasymen jáne balyq sharýashylyǵy ınspektsııalarymen birlesip 74 reıdtik shara júrgizgen.
«Túrkistan oblysyndaǵy sý aıdyndaryndaǵy qaıǵyly jaǵdaılar búginde eń ózekti máselelerdiń biri bolyp otyr. Óńirdegi qaýipsizdik sharalaryn kúsheıtý barysynda turǵyndarmen, ata-analarmen kezdesýler ótkizildi. Bilim berý uıymdarynda ınteraktıvti sabaqtar jáne áleýmettik jelilerde «Sýdaǵy qaýipsizdik» jáne «Balyq aýlaý kezindegi qaýipsizdik sharalary» taqyrybynda nasıhat jumystary júrgizildi. Turǵyndarǵa «Sýǵa túsýge tyıym salynady» degen belgiler ornatylǵan jerlerde shomylýǵa bolmaıtyndyǵyn eskertemiz. Budan bólek, sýǵa qaıyqtardan, katerlerden, jaǵajaılardan sekirýge jáne mas kúıde shomylýǵa bolmaıdy», - dedi Qanat Qarabalaev.
Aıta keteıik, Túrkistan oblysy aýmaǵyndaǵy sý nysandarynyń jalpy sany - 4 334. Onyń ishinde 42 sý qoıma, 149 iri jáne kishi ózen, 25 kól, 2 870 kanal jáne 1 248 qashyrtqy bar.
