Túrkistan oblysynda áskerıler poıyzda naýqastanǵan jolaýshylarǵa kómek kórsetti
TÚRKІSTAN. QazAqparat - Túrkistan oblysyndaǵy 6698 áskerı bóliminiń qyzmetshileri «Túrkistan - Astana» baǵytyndaǵy poıyzda naqastanǵan jolaýshylarǵa kómek kórsetti, dep habarlaıdy QazAqparat tilshisi.
QR Ulttyq ulan «Ońtústik» óńirlik qolbasshylyǵy baspasóz qyzmetiniń málimetinshe, atalǵan áskerı bólimniń qyzmetshileri maıor Eskendir Saraýbekov pen Nurjan Badenov, aǵa leıtenant Qýanysh Ahmetov pen 3-synypty serjant Baýyrjan Toqmaǵanbetov Shymkentten Qaraǵandyǵa kezekti shaqyrylýshylardy jetkizý úshin poıyzǵa otyrǵan.
«Túrkistan - Astana» baǵytyndaǵy poıyzda maıor Eskendir Saraýbekov pen áskerı bólimniń dárigeri Qýanysh Ahmetov 60 jastaǵy Qaraǵandy qalasynyń turǵyny Serikjamal Ábdiraevanyń tynysy tarylyp, qınalyp jatqanyn baıqap qalǵan. Zeınet jasyndaǵy áıeldiń sozylmaly demikpe aýrýy órship, oǵan qajetti dári-dármegi aıaqtalyp qalǵan eken. Áskerıler oǵan tıisti medıtsınalyq kómek kórsetken. Sondaı-aq, Ulandyqtar poıyzdyń 9-shy vagonynda kishkentaı búldirshinniń qatty jótelip jatqanyn bilip, oǵan da kómekke keledi. Balany emdegennen keıin ol tynyshtalyp, uıyqtap qalǵan»,- delingen habarlamada.
Áskerılerdiń dárigerlik kómegi munymen shektelmegen. Olar sonymen qatar tún jarymda ystyǵy kóterilgen 18-vagon jolaýshysyna da medıtsınalyq kómek kórsetedi. Aǵa leıtenant Qýanysh Ahmetov es-túzsiz jatqan boıjetkenge em-dom jasap, úıine jetkende emhanaǵa júginýge keńes bergen.
