Túrkistan oblysynda áskerı mindetti sarbazdardyń jumysy qorytyndylandy
Áskerı mindettilerdiń qatarynda qyzmet etken oblys ákiminiń orynbasary Sáken Qalqamanov qıyn sátte elmen, halyqpen birge ekendikterin kórsetken áskerılerge alǵysyn jetkizdi. Olardyń blok-beketterde tártipti kúsheıtip, zalalsyzdandyrý jumystaryna atsalysqanyn atap ótti. Qalalyq polıtsııa ókilderimen birge móltekaýdandarda patrýldik qyzmet atqarǵanyn tilge tıek etti.
«Túrkistan oblysy aýmaqtyq qorǵanys brıgadasy basshylyǵy men áskerı qyzmetkerleri oblys ortalyǵynda blokpostardy kúsheıtý jáne patrýldeý jumystaryn júrgizdi. Arnaıy jıyn bir aı ishinde aýqymdy jumystar atqardy.
Atap aıtqanda, Maqtaaral aýdanynda bolǵan tehnogendi sıpattaǵy tótenshe jaǵdaıdyń saldaryn joıý úshin tartylǵan Maqtaaral, Jetisaı, Saryaǵash, Keles, Shardara aýdandaryndaǵy bólimsheleriniń sarbazdary áskerı qyzmetin joǵary deńgeıde atqardy. Jıyn kezinde, árqaısylaryńyz janqııarlyq pen áskerı tártiptiń úlgisi boldyńyzdar»,- dedi Sáken Qalqamanov.
Oblys ákiminiń orynbasary sondaı-aq birqatar jaýyngerlerge QR Qorǵanys mınıstri, general-leıtenant N. Ermekbaevtyń arnaıy gramotasyn jáne Ońtústik óńirlik qolbasshylyǵy áskerleriniń qolbasshysy, general-maıor K.Karakýlovtyń alǵys hatyn tabystady.
Aıta keteıik, oblys boıynsha tirkelgen 230 áskerı mindettiniń 50-i Túrkistan qalasyna jumyldyrylǵan bolatyn. Olarǵa turaqty jumysyndaǵy jalaqy mólsheri ózgerissiz berilip otyrdy. Al, jumyssyz retinde tirkelgen azamattar 42500 teńge kóleminde alǵan.