Túrkistan oblysynda «Ashyq» jobasyna qatysýǵa 150-ge jýyq kásipker ótinim bergen

TÚRKІSTAN. QazAqparat - Túrkistan oblysynda pandemııa kezinde turalap qalǵan kásipkerlik nysandar jumysy jandana bastady. Búginde «Ashyq» jobasyna qatysýǵa 150-ge jýyq kásipker ótinim berdi, dep habarlaıdy QazAqparat tilshisi.

Oblystyq kásipkerler palatasy dırektorynyń orynbasary Zýhra Amırovanyń aıtýynsha, óńirde júzege asyrylyp jatqan «Ashyq» jobasy óziniń oń nátıjesin berip otyr.

«Oblysta jańa júıeni paıdalana otyryp, kásibin júrgizgisi keletin kásipkerler qatary artyp keledi. Búginge deıin 150-ge jýyq kásipker «Ashyq» jobasyna qatysýǵa ótinim bergen. Onyń ishinde 86 ótinish maquldanyp, QR-kod alǵan. Qalǵan ótinimder boıynsha tıisti qujattaryn tekserý jumystary júrgizilýde«, – dedi Z.Amırova.

Jobaǵa qosylý úshin berilgen ótinimderdiń deni qoǵamdyq tamaqtaný oryndaryna tıesili. Sondaı-aq, olardyń qatarynda boýlıng, bılıard, monsha, kınoteatr jáne kompıýterlik klýbtar bar.

Mamandar «Ashyq» jobasyna qatysyp, QR kod alý úshin infokazakhstan.kz saıty arqyly ótinim bere alatynyn aıtady. Eger kásipker ózi saıt arqyly tapsyra almasa nemese jobaǵa qatysty saýaldar týyndaǵan jaǵdaıda Kásipkerler palatasynyń mamandary keńes berip, qoldaý kórsetetýge daıyn ekendikterin jetkizdi.