Túrkistan oblysynda asa aýyr júk tıegen kólik júrgizýshilerine aıyppul salyndy
TÚRKІSTAN. QazAqparat – QR Sybaılas jemqorlyqqa qarsy is-qımyl agenttiginiń Túrkistan oblysy boıynsha departamenti oblystyq kóliktik baqylaý ınspektsııanyń kóshpeli baqylaý beketimen birlesip, reıdtik sharalaryn júrgizdi. «Sapaly jol - adaldyq alańy» jobasy aıasynda uıymdastyrylǵan shara oblystyq mańyzy bar Ordabasy, Arys, Shardara, Saryaǵash tas jolynyń boıynda uıymdastyryldy, dep habarlaıdy QazAqparat tilshisi.
Atalǵan reıdke «Túrkistan - adaldyq alańy» jobalyq keńsesiniń menedjeri D.Ǵanıuly men oblystyq kóliktik baqylaý ınspektsııanyń bólim basshysy B.Baýyrjanuly, «Arys-adaldyq alańy» jobalyq keńsesiniń jetekshisi N. Erkebaev pen jolǵa jaýapty birqatar mamandar qatysty. Shara kezinde jalpy sany 16-dan astam aýyr júk tasymaldaýshy kóligi toqtatylyp, tekserildi. Júk tasymaldaýshylarǵa mamandar tarapynan arnaıy keńester berildi. Reıd barysynda júk kólikterin arnaıy tarazyǵa salý arqyly júktiń salmaǵy baqylanyp, anyqtalǵan zańbuzýshylyqtarǵa ákimshilik 3 hattama toltyryldy. Júk kólikteriniń júrgizýshilerine quny 127 890 teńge kóleminde aıyppul salyndy.
Aıta keteıik, «Túrkistan – adaldyq alańy» jobalyq keńsesiniń jumys josparyna sáıkes aýyr júk kólikteriniń shamadan tys júk artýyn toqtatý men jańadan tóselgen tegis joldardyń buzylýyna jol bermeý maqsatynda osy ýaqytqa deıin Túrkistan oblysy aýmaǵynda Túlkibas, Saıram, Qazyǵurt aýdandaryna reıdtik jumystar júrgizilgen.
