Túrkistan oblysynda arnaıy jasaqtalǵan ásker dezınfektsııalaý sharalaryna qatysady
TÚRKІSTAN. QazAqparat – Tótenshe jaǵdaıǵa baılanysty áskerı mindettilerdi arnaıy jıynǵa shaqyrý jónindegi Memleket basshysynyń Jarlyǵyna sáıkes, Túrkistan oblysynda aýmaqtyq ásker jasaqtaldy.
Aýmaqtyq áskerıler blokposttarda qyzmet atqaryp, zalalsyzdandyrý jumystaryna qatysady, dep habarlaıdy QazAqparat tilshisi.
Jańadan jasaqtalǵan erikti sarbazdar qataryna oblys ákiminiń orynbasary Sáken Qalqamanov pen Túrkistan qalasy ákimi apparatynyń basshysy sapqa turdy. Halyqtyń qaýipsizdigi men densaýlyǵyn qorǵaý jáne qamtamasyz etý jumystary úshin eń úzdikter iriktelip alyndy. Olar burynǵy desantshylar, motoatqyshtar, jaýyngerlik jáne saıası daıyntyq úzdikteri. Túrkistan oblysynyń ákimi Ómirzaq Shókeev syn-saǵatta arnaıy jıynǵa shaqyrylǵan azamattarǵa sáttilik tiledi.
«Ózderińizge belgili, Memleket basshysy Qasym-Jomart Toqaev áskerı mindettilerdi arnaýly jıyndarǵa shaqyrý týraly qaýlyǵa qol qoıǵan bolatyn. Qaýlyǵa sáıkes, Qazaqstan Respýblıkasy Qarýly Kúshteriniń aýmaqtyq áskerlerin jasaqtaý úshin áskerı mindettiler arnaýly jıyndarǵa shaqyryldy. Osyndaı qıyn-qystaý kezeńde elmen birge bolýǵa erikti túrde nıet bildirgenderińiz úshin alǵys aıtamyn»,-dedi oblys ákimi Ómirzaq Shókeev.
Aıta keteıik, Prezıdent bastamasyn qoldaǵan ári erikti túrde sapqa turǵysy keletin túrkistandyqtardyń qatary qalyń bolǵan.
Oblys ákiminiń qaýlysyna sáıkes, óńirde elimizdiń Qarýly Kúshteriniń aýmaqtyq áskerin jasaqtaýǵa 230 azamat shaqyrylǵan. Onyń ishinde oblys ortalyǵynda 50 sarbazdan turatyn áskerıler jasaǵyn qala ákimi Rashıd Aıýpov basqaratyn boldy. Barlyq úmitkerler arnaıy medıtsınalyq komıssııa saraptamasynan ótken. Karantın rejımin qamtamasyz etý sharalary aıasynda Qarýly Kúshterdiń jasaqtalǵan zapastaǵy sarbazdary kóshelerde jaıaý patrýldeýge jáne oblysty aınala qorshaı qoıylǵan blokposttarda qyzmet atqarmaq. Arnaıy jasaqtalǵan sarbazdar búginnen bastap iske kiristi. Olar qajetti kıim men ystyq tamaqpen qamtamasyz etilgen.
«Jumysy bar eriktilerdiń laýyzymy men aılyq jalaqysy saqtalady. Jumys istemeıtinderine memleket esebinen eń tómengi jalaqy mólsheri 42 500 teńgeden tólenedi. Tótenshe jaǵdaı kezinde ár salada jaýapty qyzmette júrgender jáne 18 jasqa deıingi 3 balasy barlar, densaýlyǵy jaramaıtyndar shaqyrylmaıdy. Arnaýly jıynǵa shaqyrtylǵan áskerıler turaqty eldi mekenine qyzmet etedi»,- deıdi oblystyq tótenshe jaǵdaı shtabynyń músheleri.
