Túrkistan oblysynda Armenııadan ákelingen 500-den asa kólik bar

TÚRKІSTAN. QazAqparat – Túrkistan oblysynda Armenııadan ákelingen kólikter sany 531 bolsa, onyń ishinde 330-y tirkelýi tıis, dep habarlaıdy QazAqparat tilshisi.

Oblystyq PD baspasóz qyzmetiniń málimetinshe, osy elden kólik satyp alǵan ózge azamattarǵa túsindirý jumystary júrgizilýde. Túrkistan qalasynyń Mamandandyrylǵan halyqqa qyzmet kórsetý ortalyǵynda Ákimshilik polıtsııa basqarmasynyń bastyǵy Almashan Tastanbekov turǵyndarǵa kólikterdi tirkeý boıynsha jan-jaqty aıtyp ótti. Odan bólek onlaın rejımde, Polıtsııa departamentiniń áleýmettik paraqshalarynda tikeleı efır arqyly jeli qoldanýshylarynyń da suraqtaryna naqty jaýaptar berdi. Polıtsııa polkovnıgi 10 kún ishinde 300-ge jýyq turǵynǵa keńes bergen.

«Azamattarǵa Armenııalyq kólikti 2020 jyldyń 1 qyrkúıegine deıin tirkeýge bolady. Tirkeý Armenııa Respýblıkasynyń ýákiletti organy bergen tirkeý qujattarynda ıesi retinde kórsetilmegen tulǵalarǵa júzege asyrylmaıdy. Sonymen qatar, bul kólikti ózge adamnyń atyna aýdara almaısyz. Túrkistan oblysy polıtseıleri Armenııadan ákelingen kólikti tirkeý erejelerin túsindirý úshin Mamandandyrylǵan halyqqa qyzmet kórsetý ortalyǵynda Call-ortalyǵy kún saıyn saǵat 09:00-den 19:00-ge jumys isteıdi»,-dedi Almashan Tastanbekov.