Túrkistan oblysynda «Ardagerlerdi ardaqtaıyq» jobasy júzege asýda

TÚRKІSTAN. QazAqparat – «Nur Otan» partııasynyń bastamasymen júzege asyp jatqan «Ardagerlerdi ardaqtaıyq» jobasy aıasynda Túrkistan oblysynda da jalǵasyn tabýda. Oblystyq partııa fılıalynyń ujymy ekinshi dúnıejúzilik soǵysynyń ardagerleri men tyl eńbekkerlerine jáne Aýǵan soǵysyna qatysýshylarǵa áleýmettik kómek kórsetti, dep habarlaıdy QazAqparat tilshisi.

Aq halatty abzal jandar ardagerlerdi medıtsınalyq tekserýden ótkizse, belsendi jastar úı-ishilik sharýalaryna jardemdesti.

«Biz árdaıym Otanymyzdy qorǵaýdy maqsat tuttyq. Ardagerlerdi ardaqtap, qurmet kórsetip, syılap otyrǵan «Nur Otan» partııasynyń músheleri men dárigerlerge rızashylyǵymdy bildiremin», – dedi Uly Otan soǵysynyń ardageri Ábjappar Daırabaıuly.

Búginde Ábjappar qarııa 94 jasqa tolyp otyr. Qartaısa da qoǵamda bolyp jatqan jańalyqtardy qalt jibermeıdi. Qajet kezinde ún qosyp, ózindik pikirinde bildirip otyrady. Kezdesýde qarııa kóshbasshy partııanyń qolǵa alýymen júzege asyp jatqan isterge de joǵary baǵasyn berdi.

«Nur Otan» partııasy Túrkistan oblystyq fılıaly tóraǵasynyń orynbasary Qalıma Jantóreeva soǵys ardageriniń jaǵdaıyn surady. Aktsııanyń maqsatymen tanystyryp, tolǵandyryp júrgen máselelerin bildi.

«Biz ardagerlerimizge tek jeńis kúninde ǵana emes, turaqty túrde kóńil bólip otyramyz. Bul is-shara oblysymyzǵa qarasty aýdan, qalalardyń barshasynda ótip jatyr» – dedi Q.Jantóreeva.

Aıta keteıik, búgingi tańda Túrkistan oblysynda 60-qa jýyq ekinshi dúnıejúzilik soǵysy jáne 9500-den astam tyl ardagerleri bar. Joba aıasynda nurotandyqtar barsha jeńis jemipazdaryna qurmet kórsetýdi josparlap otyr.