Túrkistan oblysynda Alǵys aıtý kúni 10 kún boıy atalyp ótedi

TÚRKІSTAN. QazAqparat – Túrkistan oblysynda Alǵys aıtý kúni 10 kún boıy atalyp ótedi. Bul týraly oblystyq Qoǵamdyq damý basqarmasynyń Qazaqstan halqy Assambleıasy hatshylyǵy jáne etnosaralyq qatynastardy damytý bóliminiń basshysy Tımýr Oralbekov málim etti, dep habarlaıdy QazAqparat tilshisi.

Túrkistan oblysynda 1 naýryz – Alǵys aıtý kúniniń mán-mańyzyn arttyrý baǵytynda ıgi sharalar qolǵa alynyp jatyr. Aýqymdy sharalar 20 aqpan men 1 naýryz aralyǵynda ótedi.

«Alǵys aıtý kúni – bul otandyq patrıotızmniń, birlik pen dostyqtyń jarqyn merekesi. Atalǵan mereke elimizde 2016 jyldan beri merekelenip keledi. Basty maqsatynyń biri – óskeleń urpaqty dostyq pen otansúıgishtikke tárbıeleýge saıady. Sonymen qatar mereke elimizde etnosaralyq kelisim men ultaralyq qarym-qatynasty nyǵaıtýǵa negizdelgen. Alǵys aıtý kúni aıasyndaǵy iske asyrylatyn barlyq is-sharalar ulttyq birlik pen barsha otandastarymyzdyń bir-birine degen dostyǵy men meıirimdiligin kórsetýge yqpal etedi», - dedi Tımýr Qurbanuly.

Brıfıngide «Qoǵamdyq kelisim» KMM basshysynyń orynbasary Ernazar Baetov bıylǵy Alǵys aıtý kúni merekesi jyldaǵydan ózgeshe formatta ótetindigin atap ótti.

«Oblysta 21-25 aqpan aralyǵynda»Qaıyrylymdyq kerýeni«aktsııasy aıasynda jáne 22 aqpanda etnos jastary arasynda sýret salýdan baıqaý ótkizilmek.

Al 23 aqpan kúni etnos ókilderiniń qazaq rýhanııatyndaǵy uly tulǵalardyń týyndylaryn memlekettik tilde oryndaýdan baıqaý uıymdastyrylady.

Budan bólek, 24 aqpanda «Qamqorlyq» aktsııasy aıasynda jalǵyzbasty zeınetkerlerge úı sharýasyna kómektesý, 25-26 aqpan aralyǵynda etnos ókilderiniń qatysýymen tazalyq, abattandyrý, kóshetter otyrǵyzý jumystary josparlanǵan.

28 aqpan men 1 naýryz aralyǵynda etnos ókilderi birqatar qoǵamdyq oryndarda merekelik syılyqtar taratý aktsııasyna qatysady», - dedi Ernazar Baetov.